Ki sengbhalang kiba wan rung hapoh elaka ki dei ban da ïoh jingbit shwa: F Bareh

Khliehriat jymmang 17: Ha ka jingialang jong ki dkhot executive jong ka elaka Nongkhlieh bad la pynlong hynin ka sngi saitjaiñ ha shnong Moolasngi, la ïa don ryngkat lang ruh bad ki trai jaka kiba napoh elaka Nongkhlieh bad ki la kubur ba ki la ai ïa ki jaka jong ki sha ka company Shree cement Ltd na ka bynta ka Block-I, kata ha Lum Shyrman, elaka Nongkhlieh bad la pynsngew ruh ïa kane da uwei na ki trai jaka u bah Khrehbha sukhlaiñ.
Haba kren sha ki pathai khubor, na ka liang u Secretary Elaka Nongkhlieh, u bah F.Bareh ruh u la pynsngew ïa kane ka jingai jaka ki trai jaka sha ka company Shree cement bad pynpaw ruh ba kane ka jingai jaka kam dei kaba ki die duh, hynrei ka dei lyngba ka Lease System ha kaba ka company ka hap ban pynthymmai ïa ka lease ynda la kut ka por, shuh shuh u la kren ruh bad pynkynmaw ruh ïa ka rai jong ka elaka Nongkhlieh halor ka jingkhang pyrshah ïa ka jingwan rung ki sengbhalang hapoh ka elaka, ha kaba ïa kane ka rai la shim ha ka jingialang ba la pynlong myn ha ka 9 tarik u bnai lber 2026 bad la pyntreikam mardor ruh naduh ka 14 tarik u bnai lber 2026 hi, halor kane u bah F,Bareh u la ong ba “Lada ki sengbhalang ki kwah ban rung ki hap ban da pan jingbit na ka elaka bad lada ki rung khlem ka jingtip ka elaka bad lada jia kano kano kaba sngewsih ka elaka kan nym shim ia ka jingkitkhlieh”
Shuh shuh u bah F.Bareh u la ong ba ka elaka ka la dep ïa pynbeit bad ka company Shree Cement ha kaba ïadei bad ka dor jaka jong ki trai jaka kiba don ki jaka ha ka Block -I, ha Lum Shyrman bad ka elaka ka la dep iakren bad pynsngewthuh ruh ïa ki trai jaka ba ka company kan siew ïa ka bai jaka katkum ka jingheh ka jaka.
U la pynsngew ruh ba ka jingthmu jong ka elaka haba ka ai NOC bad wanrah ïa ka Shree Cement ha elaka ka long ban wanrah ïa ka roi ka par hapoh ka elaka bad ruh ba ki khun jong elaka kin ioh ka lad ioh kam, ioh jam ha kane ka company namar ba kumba long mynta bun ki samla ki kynduh jingeh ha ka wad kam wad jam bad shibun ki khun ka elaka kiba la don ka jingnang jingstad bad don ruh kiba la pyndep ïa ki jingpule kiba kham sha jrong ki shu shong khlem kam, khlem jam te na kata ka daw ka elaka ka pdiang ïa kane ka company ban wan hapoh ka elaka, u la bynrap ruh da kaba ong ba ka jingwan ka company kan iarap ruh ha kiwei kiwei ki jait kam, ha kaba ki khun ka elaka ki lah ban long ki nongpynhap tiar lane kaba supply tiar bad kiwei kiwei ki jait kam ruh ki ban long ka jingmyntoi ïa ki paidbah, ym tang katta, ka elaka Nongkhlieh ka la dep ruh ban ïa soi ïa ka suskular ne ka agreement bad ka company Shree Cement ba ka jingai kam ïa ki khun ka elaka nongkhlieh ka dei ban long 100 percent lait noh sa tang ki kam ba ki khun ka elaka kim lah ban trei.
Na ka liang u bah Khrehbha sukhlaiñ, uba dei uwei na ki trai jaka u la ai khublei bad sngewnguh ïa ka elaka Nongkhlieh kaba la wanrah ïa kane ka company dewbilat hapoh ka elaka bad ong ba kane ka dei ka jingioh jngai jong ka elaka ban dup lah ban wanrah ïa ka roi ka par bad haba kren ruh na ka bynta jong baroh ki trai jaka kiba la ai sha ka company, u la ong ba kum ki trai jaka ki dap da ka jingsngew kmen ba wan ka company, shuh shuh u la kyrpad ïa ki senghalang ba kin sngewha ban nym pynduh lad ïa ki kiba dei ki trai jaka kiba la ai jaka na ka bynta ban tih ïa u mawshun ha ka Block-I.
Ha kane ka sngi la ïa don lang ruh ki dkhot ka executive jong ka elaka Nongkhlieh ba kynthup u bah HoldingBamon, uba na shong Tongseng (Nongkhlieh), u bah Sedwik Bareh, na Shnong Rim, bah Ebenezer Patlong, na Tongseng (Nongkhlieh), bah Hoimat Phyrngap, na Daistong, bah Dapbiang Sukhlaiñ, na Moolasngi lem bad ki trai jaka kiba la pynpaw ïa ka jingmynjur jong ki da kaba rah kti kum ka dak ba ki kloi ban ai jaka sha ka company.