Nongpoh, Jymmang 16: Ka Umsning People Front (UPF), kaba dei ka kynhun ba ju ïarap paidbah hapoh ka Umsning Constituency, mynta ka sngi ka la aiti ïa kawei ka ïing paka kaba thymmai sha ka Kong Jenny Merry Lapang na ka shnong Umsaw Nongkharai, kaba la mad jingeh la kham slem bad hap ruh ban shong ban rah ha ka iing bala jot rathai.
Ïa kane ka ïing la plie bad aiti paidbah da u Chairman ka UPF, u Dr. David Lyngdoh ryngkat bad u General Secretary Bah Kitdorius Dkhar, ha ryngkat ka jingdonlang ki nongïalam shnong, ki nongïalam ka RAWA bad ki nongkitkam ka UPF.
Kumba la pynpaw ha kane ka sngi, ka longïing jong ka Kong Jenny Merry kala mad ïaka jingeh kaba khraw namar ka jingduk jingkyrduh bad hap ruh ban sah ha ka ïing trep kaba la jot bad kaba buh jingma khamtam ha ki por slap. Kumta ka UPF ka la shim ïa kane ka sienjam ban pynïoh noh ïa ka ïing kaba paka na ka bynta ka jingshngaiñ jong ka longïing ba kin lait naka sngi u slap.
Haba kren ha kane ka sngi, ka Kong Jenny Merry kam lah khlem da jaw ki ummat jingkmen bad pynpaw ïa ka jingsngewkmen jong ka bad ka jingsngewnguh kaba khraw ïa ka seng UPF kaba la sngap ïa ka jingeh jong ka longïing bad ban pynurlong ïaka jingangnud da kaba pynshna da ka ïing kaba thymmai.
Na ka liang u Dr. David Lyngdoh u la ong ba kane ka jingïarap ka long shi bynta ban kyrshan ïa ki longïing kiba donkam jingïarap ha ka imlang sahlang. U la ai khublei ruh ïa ki dkhot ka UPF bad baroh kiba la noh synñiang ban pynurlong ïa kane ka kam ban ioh pynshna iing ïa katei ka longiing kaba donkam shisha ka jingïarap.
