Shillong, Naiwieng 15 : U State President ka National People’s Party (NPP), Meghalaya Bah Prestone Tynsong u la ïathuh ba ki don haduh 5 ne 6 ngut ki kyrtong kiba pan tiket na ka bynta ban aireng ha ka elekshon MP na Shillong Parliamentary Seat kaban sa long shen ha u snem ban wan.
Da kaba pyntip ba ïa ka kyrteng jong u kyrtong MP na Shillong kin pynbna noh mynta u bnai hi, u State President u la ïathuh ruh da kaba ong, “Ki don hi 5 ne 6 ngut ki kyrtong kiba pan tiket na ka party.”
Ha kawei pat ka liang, u Bah Prestone ba dei ruh ha kajuh ka por u Symbud Myntri Rangbah u la ïathuh ba um don jingtip ei ei halor ka jingphriang ki khubor ba ka don ka jingpynbor ban ai tiket MP ïa u Myntri barim ka sorkar jylla Bah Dasakhiat Lamare na Shillong seat.
“Ngam tip ei ei halor kata, bad ka jubab nanga ka long ba em ym don satia kum kata,” ong u Bah Prestone.
Dang shen ki la phriang ruh ki khubor ba ki don katto katne ngut ki nongïalam ka NPP kiba kwah ban wallam da u MLA barim ka TMC na Umroi, Bah George B Lyngdoh kum u kyrtong. Hynrei haba pyrshang ban wad jingtip halor kane na ka liang ki nongïalam ka party ki la ïathuh ba haduh mynta hi kam pat don satia kano kano ka jingïakren halor katei ka bynta ban wallam da u Bah George kum u kyrtong.
Hynrei la ïathuh ba haduh mynta hi kiba paw kyrteng kham hakhmat dei tang u Bah HM Shangpliang, MLA barim ka Mawsynram uba la phet noh na ka BJP bad ïasoh sha ka NPP.
Wat hadien ba u President u la ïathuh ba ki don 5 – 6 ngut ki kyrtong kiba pan tiket hynrei ki nongïalam ka party (bym kwah ban pynpaw kyrteng) ki la ïathuh kim pat tip lut kiei kiei ki kyrtong tangba ki ong pat ba lehse katei ka dang dei tang ka jingïakren hapdeng ki nongïalam kiba hakhmat.
Kumba long haduh mynta hi, dei tang ka Voice of the People’s Party (VPP) kaba la pynbna ïa u kyrtong, kata u Dr. Ricky J Syngkon kum u kyrtong, katba ka Congress pat ka la ai dak ba kan pynieng biang da u juh, kata u Ma Vincent H Pala. Kumta kaba sah mynta ka long sa tang na ka BJP, UDP bad kumjuh ruh na ka NPP.
