Khliehriat, Lber 3 : Ki nongïalam bad ki dkhot jong ka Hynñiewtrep Achik National Movement Narpuh Circle, kaba hapoh ja jingïalam u President, u bah P.Syiemlieh, myn ha ka 1 tarik u lber 2023, ki la leit ban noh syniang da ki tiar skul sha ki khynnah skul ha shnong Chiehruphi, East Jaiñtia Hills District, ha kajuh ka por ki nongïalam ka seng na Narpuh ki pam map na ki kmie ki kpa ba kim lah ban ïarap shibun hynrei ki la pyrshang ban ïarap katba lah la ka bor namar kane ka dei ruh ka sien ba nyngkong ba ka HANM Narpuh Circle ka pyrshang ban kner ïa ki kti ban ïarap bad la khmihlynti ba ka seng kan sa nang lah ban leh shuh shuh ïa kum kine ki kam nohsyniang ha ki por ki ban wan.
U bah P.Syiemlieh, u pynpaw ka jingsngewkmen ba ka seng ka la lah ban noh syniang lem sha ka imlang ka sahlang watla ka long ka tang da ki jingai kiba rit ruh, u kyrpad ïa ki kmie ki kpa ba kin sngewbha ban nym thew ïa ki jingduna ka seng, namar kane ka dang dei tang ka synjam kaba nyngkong jong ka seng na kane ka circle ban noh jingïarap, u la ai ki kyntien sneng kyntu ïa ki khynnah skul ba ki dei ban long kiba trei shitom ha ki jingpule jong ki ba kin kiew shaphrang ha ka jingnang jingstad, u la kyntu ruh ba ki dei ban long kiba minot, kiba don akor, donburom, kumjuh ruh ban long ki khynnah kiba kongnguh ïa ki kmie ki kpa bad kumjuh ruh ïa ki nonghikai.
Kumjuh ruh na ka liang u Secretary Shnong ba rim jong ka Chiehruphi, u bah Dametreyo Rymbai, uba la ïa don ryngkat lang bad ki dkhot ka HANM Narpuh Circle ha katei ka sngi, u la ai ka jingkhublei sngewnguh bad sngewburom ïa ka HANM Narpuh Circle, kaba la shim ïa kane ka synjam ban wan ban noh jingïarap ïa ki khynnah skul, u la ai ruh ka jingkitbok kitrwiang ïa ka seng ba kan nang ïai kiew shaphrang ba kan nang lah shuh shuh ruh ban ai ka jingshakri ïa ka imlang ka sahlang ha ka thaiñ ha baroh ki liang, ha kajuh ka por, u la kyntu ïa ki khynnah ba kin long kiba trei shitom, kiba minot ha ki jingpule ba kin kiew shaphrang ha ka jingnang jingstad bad kumjuh ruh ha ka akor ka burom, ba kin long ruh ki khlur ba phyrnai jong ka ri bad ka jaitbynriew.
Ha katei ka sngi ka seng ka la sam da ki copy, ki let, eraser, ki pencil box sah ki khynnah, kiba dei ki tiar donkam jong ki ha skul.
Ha ka jingïalang la ïa don lang ruh u Publicity Secretary ka HANM Narpuh Circle, u bah S.Pala lem bad ki dkhot lem bad ki khynnah skul, ki kmie ki kpa.
