Pynlong ka ophis DSO-EJHD ïa CM-YEP 2026 ha Latyrke da ki jingiakop bapher bapher

Khliehriat nailur 33: Ka ophis jong ka District Sports Officer (DSO), East Jaiñtia Hills District ha ryngkat ka jingiatreilang bad ka ophis jong u Block Development Officer, Saipung C&RD Block mynhynin ka 22 tarik bad mynta ka sngi 23 tarik nailur ka la pynlong Second Block Level Chief Minister’s Youth Engagement Programme (CM-YEP) 2026, ha Latyrke Community Hall bad la wan ban iashimbynta da ki khun samla na ki shnong bapher bapher bad khynnah skul na ki skul bapher bapher ba hap hapoh ka Saipung C&RD Block.
Kane ka Chief Minister’s Youth Engagement Programme (CM-YEP) 2026, ka don ka phang pdeng kaba ïadei bad ki samla ka “Young Meghalaya, Shaping Tomorrow” bad kane ka prokram ka don ka jingthmu ban wanrah ïa ki samla kiba don ki sap ki phong ba kin kiew ha rynsan ban pynpaw ïa ki sap ba ki don bad kane ka dei ruh kawei na ki rynsan ka ban kyntiew ruh ïa ki sap ki phong, ka long ruh kum ka lad ha kaba ki samla ki ioh ban ïashimbynta ha ki bynta bapher bapher, kumjuh ruh kane ka dei ka rynsan ka ban kyntiew ïa kano kano ka kynhun, ban pynioh ïa ka jingsngew skhem bad ruh ban kyntiew ïa ka jinglong nongïalam lada ki don ka sap ne ka jingangnud ban long ki nongialam.
Haba kren ha ka prokram ka District Sports Officer (DSO), East Jaiñtia Hills District, ka kong S. M. Rapsang ka la iathuh ba ïa kane ka prokram la pynlong ha ki Block level kumba la bthah da u myntri rangbah ka jylla u Conrad K. Sangma bad ka jingpynlong ha ki block level kan pynlah ïa ki khynnah skul bad ki samla jong na ki shnong bad na ka thaiñ ba kin ioh ka lad ban wan ban iashimbynta lang, la ong ruh ba kito kiba jop ha ki jingiakop ha ki block level kin ioh ka lad ban ïakop sa ha ka District Level bad lada ki jop ha ka District level kin ioh ban mihkhmat na ka East Jaiñtia Hills District ha ka State Level.
Ka kong Rapsang ka la ong ba haba ianujor bad ki snem kiba la leit, mynta u snem 2026 ka la don ka jingkiew ha ka jingwan ki nong poi ki nongïalam iashimbynta, Ha kine ki ar sngi lynter la ioh ban pynlong ïa ki prokram bapher bapher ba kynthup ka One Act Play, kaba tem Guitar (Solo), kaba kren ha rynsan paidbah lane ka Declamation, ka Quiz, ka jingiatan tyllai lane ka Tug of War, ka jingiakop ai rong lane Painting, ka jingshad tynrai, ka jingrwai tynrai, ka Science Mela, ka jingiakop thoh Poetry, ka jingiakaop thoh jingiathuhkhana bad kiwei kiwei ki sap ba kyrpang ba ki don la pyni ha rynsan.
Ka jingthmu jong ka ne ka jingpynlong ïa ki jingiakop bapher bapher ka long ban pynlong ïa ki khynnah bad ki samla ba kin don ka jingsngewskhem, ba kin don ki jinglong kiba bit ban long ki nongïalam bad ban kin don ka jingkitkhlieh, ka District Sports Officer ka la ai mynsiem bad pynshlur ïa ki khynnah skul bad ki samla ba ki dei ban don ka jingbuh thong ban tei ïa ka lawei kaba don jingmut ban pynlong ïa ka jylla Meghalaya kaba kiew irat.
Na ka liang u Block Development Officer, Saipung C&RD Block, u Dr. R. Pyrtuh, u la ong ba kane ka Chief Minister’s Youth Engagement Programme (CM-YEP) ka dei kaba ju pynlong man la u snem bad ka thong ne ka jingthmu jong kane ka prokram ka long ban kyntiew ïa ki sap ki phong jong ki samla, u la kyntu ïa ki khynnah skul bad ki samla kiba na ki shnong ki thaw ba ki dei ban don ka jinglong kaba ryntih lane ka discipline, ka jinglong ba bha, ba sbun ban dup lah ban tei ïa ka longbriew man briew bad ruh ban long kiba lah ban nohsyniang sha ka imlang sahlang da ki kam ba bha ba ki trei bad da ki sap ki phong ba ki don.
U Dr. Pyrtuh, u la la ai khublei ïa ki nonghikai skul kumjuh ruh ïa ka District Sports Officer bad ia ki tnat kiba ia donbynta lang ha kane ka prokram namar ka jingtreishitom jong ki la lah ban pynlong ïa ka prokarm ha ki block bapher bapher bad u kyrmen ba kane ka prokram kaba la pynlong bad kaban sa pynlong sa ha kiwei kiwei ki jaka kan long ka prokram kaba jop bad kan wanrah ïa ka lad ka lynti kaba donjingmut na ka bynta ki samla bad ki khynnah skul kiba don ki sap ki phong.
Kum shibynta jong ka prokram la ioh ban pynlong ruh ïa ka prokram ai jingpynshai lane ka awareness session ha kaba ïadei bad ka HIV/AIDS ha kaba la pyniaid ïa kane ka prokram da u bah Sandy Tariang uab dei u Cluster Program Manager (DISHA) Meghalaya AIDS Control Society.
U bah Sandy Tariang, u la kren bad pynshai halor ka jingsaphriang u khñiang HIV bad ka jingpang AIDS bad kumno ban shim ki lad ban ïada ban lait na ka HIV, u la batai ba kumno u khñiang jingpang HIV u saphriang bad kumno une u khñiang jingpang u ktah ïa ka met bad ïa ka bor met lane ka immune system, u la pynshai ba une u khñiang jingpang u iabit dei lyngba ka jing ïa shongkha bad u/ka briew kiba don HIV bad kane ka hiar pateng sha ki khun kiba pun bad kumno u HIV u ktha ïa ka kmie ba pun bad i khyllung ba ka kha kumta u la ban jur bad kyntu ïa ki paidbah ba ki dei ban shim ïa ki lad jingiada da kaba kiar ban ïa shongkha pathar, kiar ban iashongkha bad u ne ka briew kiba don HIV, u la kyntu ruh ïa kito ki briew kiba im ba ïaid lang ba kiba don ïa u khñiang HIV ba kin wan dih dawai bad shim ki lad jingsumar na ka Antiretroviral Therapy (ART) u kyntu ruh ba dei ban kiar na kaba pyndonkam ïa u drok, ha kajuh ka por u kyntu bad pynshlai ïa ki paidbah ba kin mih shakhmat ban leh ïa ka HIV test bad ong ba ïa ka test lah ban leh ruh ha Civil Hospital, Jowai ha kaba ym donkam ban siew pisa.
Shuh shuh u bah Tariang u la pynsngew ba ki don haduh bad palat 2,500 ngut ki briew kiba na East Jaiñtia Hills District kiba don ïa u khñiang HIV.
Haba phai pat sha ki prokram bad jingiakop bapher bapher, ha ka jingiakop rwai tynrai lane Folk Song Competition, ka skul Holy Infant U. P school, Tluh ka la ioh ba nyngkong bud pat sa ka Lumjingshai Secondary School kaba long ba ar bad ka Ramakrishna Mission Higher Secondary School ka long ba lai. Ha ka jingiakop shad tynrai lane ka Folk Dance Competition, ka Lumjingshai Secondary School ka la jop ha ka kyrdang ba nyngkong bud pat sa ka Ramakrishna Mission Higher Secondary School kaba long ba ar bad ka Narwan Secondary School ka la long ba lai.
Ha ka jingiakop tan tyllai lane ka Tug-of-War na ka liang ki shynrang, ka shnong Jaraiñ ka la long ba nyngkong bud pat sa ka Ramakrishna Misssion Higher Secondary School kaba la long ba ar bad ka shnong Lumthari ka la long ba lai. Na ka liang ki kynthei pat ka Ramakrishna Mission Higher Secondary School ka la long ba nyngkong bud pat sa ka shnong Narwan kaba la long ba ar bad ka shnong Jarain ka long ba lai.
Ha ka jingiakop pyni sap lane ka Talent Show (Solo) category, ka samlaThlaii Nampui ba na shnong Saipung ka la long ba nyngkong, ka Fiduciary Shadap na ka skul Holy infant U. P school ka la long ba ar bad u Joshwamewa Dkhar na skul Holy Infant U. P school u la long ba lai.
Ha ka jingiakop pyni sap lane ka Talent Show bamihkhmat bad shimbynta da ka kynhun, ka skul Holy Infant U. P school ka la long ba nyngkong bud pat sa ka Lumjingshai Secondary School kaba long ba ar bad ka Narwan Secondary School ka la long ba lai.
Ha ka Quiz Competition, ka Ramakrishna Higher Secondary School ka la jop bad rah ia ka nam lahduh bud sa ka skul Syrlein Secondary School ka la long ba ar bad ka Lumjingshai Secondary School ka la long ba lai.
Ha ka jingiakop thoh Poetry, u Ram Shyrmang na ka skul Ramakrishna Misssion Higher Secondary School u la jopha ka kyrdan ba nyngkong bud sa ka Sofia Pakem kaba na ka skul Syrlein Secondary School kaba la long ba ar bad ka Risa Kanai na Narwan Secondary School ka la long ba lai.
Ha ka jingiakop thoh jingiathuhkhana lane Story Writing Competition, u Saiwankmen Tangliang uaba na Holy Infant U. P u la long ba nyngkonh bud pat sa u Deimonmitre Pdang ba na shnong Tluh uba la long ba ar bad u Bravewell Tangliang na shnong Mooriap u la long ba lai.
Ha ka jingiakop kren paidbah lane Declamation Competition, u Deimonmitre Pdang ba na shnong Tluh u la long ba nyngkong bud pat sa u Alithia Sutnga ba na Holy Infant U. P school u la long ba ar bad u Oplankilad Lakiang ba mihkhmat na ka Holy Infant U. P school u la long ba lai, ha kane ka prokram la don ruh ka Science Mela ha kaba ka skul Infant U. P school, Tluh ka la rah ia ka nam lahduh.
Ha ka jingiakop ai rong lane Painting Competition, u samla Heibormi Shulet ba na Narwan Secondary School u la rah ïa ka nam lahduh bud pat sa ka Prince Rymbai of Lumjingshai kaba long ba ar bad u Rimeki Salahe ba na shnong Syrlein u lalong ba lai.
Ha ka jingiakop tem Guitar, u samla Deihok Shadap ba na shnong Latyrke u la long ba nyngkong bud pat sa u Rimeki Salahe ba na Syrlein Secondary School u la long ba ar. Haka jingiakop One Act Play, ka Ramakrishna Misssion Higher Secondary ka la ioh ïa ka nam lahduh.
Ïa kiba jop ha ki jingiakop bapher bapher ba mihkhmat tang shimet la ai prize ïa ki da ka pisa ha kaba kiba wan ba nyngkong ki ioh T3000 hajar tyngka, kiba wan ba ar ki ioh T2000 hajar tyngka bad kiba wan ba lai ki ioh T1000 hajar tyngka bad kiba jop ha ki jingiakaop ba ha ki kynhun , ïa kiba wan ba nyngkong la ai T5000 hajar tyngka, kiba wan ba ar ki ioh T 3,000 bad kiba long ba lai ki ioh T2000 hajar tyngka.