Leit pynsangeh ka JNC ïa ki nongtrei bar jylla ba trei ha ki project ka EMRS ha EJHD namar bym biang ki kot ki sla

Khliehriat, Nailur 21: Ka Jaiñtia National Council JNC Central Executive Committee hapoh ka nongïalam u General Secretary, u bah Wanshwa Suting lem bad ki dkhot mynta ka sngi ki la leit jurip ïa kawei ka jingpyntrei ïa ka project kaba dei jong ka Eklavya Modern Residential School (EMRS) kaba don ha shnong Kairang, East Jaiñtia Hills District ba la pyntrei da ka Badri Rai Company bad ka seng ka la pynsangeh mardor ïa ka jingtreikam ki briew kiba dei kiba na bar ka jylla namar ba kim don ki kot ki sla kiba biang.
U bah Wanshwa Suting u la ong ba “Ha kane ka jingjurip ka seng ka la lap shuh shuh ba u contractor ba pyntrei ïa ka project u la wanrah haduh ym duna ïa ka shi spah ngut ki nongtrei bar jylla bad kine ki nongtrei kim don satia ïa ki labour license bad kiwei kiwei ki kot ki sla kiba donkam bad kine ki nongtrei ki dei kiba la shu wan trei beaiñ hapoh ka jylla bad kumta ka JNC ka la pynsangeh mardor ïa ka jingtreikam jong kine ki briew kiba na bar bad la ailad ban trei tang ki briew ba dei ki trai jylla”
Ka seng lyngba u Genaral Secretary, ka la ong shuh shuh ba ïa ki kot ki sla ba donkam na ka bynta ki nongtrei bar jylla kiba wan trei hapoh jylla Meghalaya dei ban da pynbiang naduh ka registration card kaba katkum ka MRSSA 2020 bad ruh katkum ka section 6 (1) bad ki bar jylla ki donkam ruh ban register ha Office of The Registration Officer, nalor kata kine ki nongtrei ki ei ruh ban don ïa ka Employee Service License kaba dei kat kum ka Rules 20 (1) jong ka Jaiñtia Hills District Autonomous Council Trading by non tribal rules 2015.
“Hooid ka long kaba shisha ba kane ka skul kab dei ruh ka Residential School ka long ka ban ai jingmyntoi shisha ïa ka imlang ka sahlang bad kan ïarap ruh shibun ïa ngi ki riewlum bad iarap shibun ïa ka thaiñ hi baroh kawei namar ha kane ka skul yn don ruh ki hostels, ki kynja jingialehkai sports, ki jinghikai kyrpang kum ka skill development bad ki jinghikai bapher bapher, yn don ruh ki jingmyntoi kum ia ngi ki trai ri ha ka iohkam iohjam hapoh ki tnat ne department bapher bapher ha kane ka skul bad kiwei kiwei ki jingmyntoi ruh” ong u Bah Suting.
Shuh shuh u la ong, Kane ka project ka hap hapoh ka Ministry of Tribal Affairs bad ka thong ka jong ka hi kadei ban ai jingmyntoi khamtam ïa ki trai ri trai muluk ym ïa ki bar jylla, hynrei kaba sngewsih pat ka long ba ha kane ka jingleit jurip ngi la lap ba la dap lut sa tang da ki bar jylla kiba trei hangne, ka seng ka kren shai sha kum kine ki company kim dei ban wanrah briew nongtrei na bar katba ki trai ri trai muluk ki dang lah ban trei ïa ka kam” ong u bah Wanshwa Suting.