Nongstoiñ, Lber, 3: Ka risol elekshon MLA 2023 ka la sakhi ïa ka jingkhuid syndon plaiñ jong ka party NPP ha ri lum jong ki lai tylli ki District ha West Khasi, kata ka Eastern West Khasi Hills, West Khasi Hills bad South West Khasi Hills.
Ka jingshisha hi ka paw ba ha ki Constituency bapher bapher kiba don ha ki lai District, kane ka party NPP ba la ïalam da u Conrad Sangma ka la thylli lut, kaba pynpaw ba ki paidbah West Khasi Hills hi kim pdïang da lei lei ïa kane ka party.
Kumba la sakhi ha Eastern West Khasi Hills ïa ka risol elekshon, ha Mairang Constituency u Bah Metbah Lyngdoh shongknor barim ka sorkar MDA u la jop bïang na ka party UDP. Ha Mawthad-raishan ruh u Bah Shaklïar Warjri u la jop na ka HSPDP.
Kumjuh ruh ha West Khasi Hills kaba don lai tylli ki Constituency, ar ngut ki MLA ka NPP kata u Bah Mac Millan Byrsat na Nongstoiñ bad u Bah Gigur Myrthong na Mawshynrut, ki la liem lyndang. Nangta ha Rambrai u Bah Kimfa Marbanïang u ba la rung NPP shwa ka elekshon, u la shah rem noh.
Kiba mih bujli ki long na Nongstoiñ u Bah Gabriel Wahlang na ka seng Congress, ha Mawshynrut u Bah Methodius Dkhar na ka seng HSPDP. Ha Rambrai pat u Bah R.G Momin kyrtong shimet u la jop, tangba imat une u rangbah um slem shuh ban rung syndon sha ka NPP bad ka por hi kan sa batai lano.
Ha South West Khasi Hills ruh, ki ar ngut ki MLA barim na ka seng UDP kata u Bah Pius Marweiñ bad u bah Renikton Lyngdoh Tongkhar ki la wan phai bïang sha ïing dorbar thaw aiñ da ka jingjop.
Lah ban kdew hangne ba wat ha East Khasi Hills ruh, satang u Bah Prestone Tynsong na Pynursla bad kong Ampareen Lyngdoh na East Shillong, kiba dang don ha ka party NPP. Lait nangta, la sakhi ba ki paidbah hi kim mon shuh ïa kane ka party bad man ki jaka hi, ki kyrtong kiba ïaleh na ka party NPP ki liem lyndang lut.
