Bitar tyngeh ki paidbah Mawthadraishan bad Mawshynrut ba shet kylla ki MLA

Nongstoiñ, Lber, 3: Ki tyllong khubor kiba la ïoh lum mynta ka sngi na kylleng ki jaka ka Mawthad-raishan bad Mawshynrut Constituency, la ong ba ki paidbah nongkyrshan kiba la pynjop don burom ïa ki ar ngut ki MLA ka HSPDP kata u Bah Methodius Dkhar na Mawshynrut bad Bah Shaklïar Warjri na Mawthad-raishan, mar ïa ka ïoh jingtip ki la khih bitar bad ong ba kine ki MLA ki la shet kylla kyndit kynsan bad jied ïa ka shuki ban ïa ka jaidbynriew.
Ki tyllong khubor na Mawshynrut ki ïathuh ba ki nongkyrshan ki la kren bitar da kaba ong ba lada u Bah Methodius Dkhar na ka HSPDP, un leit pynïasoh ïalade sha ka sorkar NPP, balei um shu ong ban ïa thep vote beit ha u Bah Gigur Myrthong u ba dei na ka party NPP. Hato balei ban pynjynjar pynbiej kai ïa ki paidbah, kiba la jied khnang ïa u ha ka jaka u Bah Gigur.
Kajuh kane ka sur ka la long ha Mawthadraishan, ha kaba ki nongkyrshan ki la ong ba lada u Bah Shaklïar Warjri na ka HSPDP u leit pynïasoh sorkar, balei um ong lypa naduh ba sdang ka elekshon ba kin shu kyrshan beit ïa ka kong Biolinda Lyngdoh Nonglait kaba dei na ka party NPP.
Ki khubor ki la sawa bha ha ka por janmiet jong ka sngi thohdieng ha ki ar tylli ki Constituency, ba lada ym don jingkylla na ka rai ba kine ki MLA HSPDP ki shim, ka lah ban don ka jingïalang jong ki nongïalam party ban ïakren ïa pyrkhat kaei kaba dei ban leh pyrshah ïa kine ki ar ngut ki MLA.
Lah ban kdew ruh hangne ba ha ka sngi thohdieng hi, na ka lïang u Bah K.P Pangnïang President rangbah ka HSPDP, mar ïa ïoh jingtip halor ka jingleit pynïasoh sop sop jong kitei ki ar ngut ki MLA sha ka sorkar ba la ïalam da ka NPP, mar mar u la phah da ka shithi sha u President ka NPP u Conrad Sangma, ba ka party hi kam don jingtip ba kam treh hi tdot ban ïa thaw sorkar lang bad ka NPP.