Shillong, Lber 03: San tylli ki kali sorkar bad kawei ka kali jong ki riewshimet ki la ingkhong hadieng ka jingshah wiangding ha ki paidbhur kiba la kawang maw ruh ïa ka ophis treikam jong u Deputy Commis-sioner ka Eastern West Khasi Hills District ha ka 2 tarik, Lber, 2023.
Ban tem ïa kano kano ka huri hura bad ban wanrah biang ïa ka shongsuk hapoh ka District u Deputy Commissioner ka Eastern West Khasi Hills District u la pynjari da ka Section 144 CrPC bad ka Curfew Miet ka ban sdang naduh ka por 6 baje janmiet haduh ka por 6 baje mynstep bad ha kajuh ka por la mana ruh ban ïalum briew palat san ngut shaneng ha baroh ki ophis sorkar kiba don ha ka dong Mawsawa, ha ka shnong Sangshong, ha ka dong Umwiehsup bad ha ka dong Mairang Mission naduh ka 3 tarik Lber, 2023 tad haduh ban da pynbna da kumwei pat.
Kane ka la jia hadien ba ki paidbah nongkyrshan jong ka Congress ki bym lah ban pdiang ia ka jingjop jong u kyrtong ka seng UDP u Bah Metbah Lyngdoh ki la thaw jingkul-mar da kaba kawang maw ïa ki shipai BSF bad ia ki Pulit kiba ap pahara ha khyrdop bad hadien kata ki la kawang maw sa ïa ka ophis u DC bad wiang ding ïa ki kali.
