Kurup ki pulit Umkiang 3287 bilor ki dawai ‘vincof-plus’ ba shongdor haduh 995658 lak tyngka
Khliehriat, Nailur 21: Ki pulit jong ka Umkiang Patrolling Post myn ha 16 tarik mynta u bnai ha ka miet synia ha ka por 12 baje mynmiet, hadien ka jingpynap ktem hakhmat Umkiang Police Patrol Post ha surok NH-6 ki la ioh bat ïa ka kali Maruti Swift Dzire ( rong lieh) ba don u registration number AS 11 Q 0114 ba la ñiah da u Sanjib Kumar Kanu , 26 snem kyrta,uba na ka shnong Durga Nagar Pt.V, Cachar, Assam bad kawei ka kali Maruti Swift Dzire (Golden Colour) ba don u registration number AS 01 BE 6993 ba la ñiah da u Saidul Islam Barbhuya, 34 snem kyrta ba na ka shnong Gosaipur Pt.II, Cachar, Assam bad hadien ka jingkhynra ki puliy ki la lap da ki hajar tylli ki bilor dawai Vinfof Plus syrup ba la thep hapoh ki synduk kot ba la thmu ban khaïi beaiñ ïa ki kum ki drok.
U Superintendent of Police East Jaiñtia Hills District, u Shailendra Bamaniya IPS u la iathuh shuh shuh ba napoh ka kali Maruti Swift Dzire rong lieh ki pulit ki la ioh lap 1196 tylli ki dawai Vincof Plus ba don 100ml ka dawai ha uwei u bilor, ia ïa kine ki dawai la thep hapoh ki phra tylli ki synduk kot bad napoh ka kali Maruti Swift Dzire (Golden Colour) la lap haduh 1049 ki bilor dawai ba la thep hapoh ki hynñiew tylli ki synduk kot.
Shuh shuh la ong ba ha ka 17 tarik pat ha ka por 5.20 janmiet ki pulit ki la ioh jingtip ba don kawei ka kali Swift Dzire rong lieh ba don u registration number AS 11 H 0671 ba la shu iehnoh kumto ha Kuliang bad la suba jur ba kane ka kali ka lah ban don jingiadei bad ki ar tylli ki kali ba la ioh bat da ki pulit ha Umkiang, mar mar ki pulit ki la leit sha Kuliang bad pynlong ïa ka jingkhynra bad la lap ba ki don haduh 1,042 tylli ki bilor dawai ‘vincof-plus’ Syrup ba don 100 ml ka dawai ha uwei u bilor bad la thep ïa kine ki bilor dawai hapoh ki hynñiew tylli ki synduk kot bad buh ha ka seat ba shadien.
Hadien ba ki pulit ki la pyndep ïa ki kam kiba katkum ka aiñ ba la don bad sakhi lang da ki riew paidbah, ki pulit ki la kurup noh ïa ki dawai Vincof Plus syrup kiba don 3287 bilor ba shong dor T303 tyngka shi bilor bad baroh ki dawai ba la kurup ki shong dor T 995658 lak tyngka, ki pulit ki la rah noh ruh sha thanat ïa kitei ki ar ngut kiba ñiah ïa ki kali ba la ioh bat ha Umkiang bad ka jingtohkit ka dang ïaid ban lap shuh shuh ïa kiba donkti.