Noh jingïarap ki bor district ka EJHD ïa ka samla Olivia Dkhar shuwa ban mihkhmat ïa ka ri sha Maldova

Khliehriat, Nailar 04: Ki bor district jong ka East Jaiñtia Hills District, lyngba ka CM Youth Development Scheme, ha ka Sngi Thohdieng, lyngba u Deputy Commissioner – u Shivanh Awasthi, IAS, ka la noh synñiang da ka song pisa sha ka samla Olivia Dkhar, ka samla kaba dang 16 snem kyrta ka ban sa leit ban mihkhmat ïa ka ri India ha rynsan ïakhun kti ne Armwrestling kaba sa long ha ka ri Maldova mynta u bnai Nailar , 2024.
Kum ban shu phai dien, ka samla Olivia Dkhar, 17 snem kyrta kaba na ka shnong Khahnar – East Jaiñtia Hills District, ka la shah jied ban leit mihkhmat ïa ka ri India ha ka jingïakop ïakhun kti ne ka Armwrestling kaba yn sa pynlong mynta u Nailar, 2024 ha ri Moldova, ka ri kaba don ha dewbah Europe.
Ka samla Olivia Dkhar kaba dei ka khun jong i kong Tribina Dkhar bad u kpa u Bah Shanbor Pasleiñ, ka dei ka samla kaba la wanrahnam ha kiba bun bha ki rynsan ïakhun jong ka bad ka la ïoh khur ruh ïa ka nam Lahduh napdeng ki Lahduh lane Champion of Champion ha ka lympung ïakhun jong ka ha ka 5th Meghalaya Game ka ba la pynlong ha Tura.
Ki rynsan bapher bapher kiba ka samla Olivia Dkhar ka la ïakhun bad wanrah jingjop ki kynthup ïa ka Shillong Arm Fight ba la pynlong ha u Soso Tham Audotouriom Shillong myn ha ka 19 tarik haduh 21 tarik u nohprah 2023, ka 5th Meghalaya Game ba la pynlong ha Tura (15 haduh 20 tarik u Kyllalyngkot) 2024, ha kane ka lympung ha Tura katei ka samla ka la ïoh rah ïa ka nam Champion of Champion.
Kumjuh ruh ha lympung jong ka 33rd Annual State Level pat ba la pynlong ha ka 5 tarik bad 6 tarik u bnai ïaiong, 2024 ba la pynlong ha U Soso Tham Auditorium Shillong ka la ïoh ïa ka nam lah duh ha ka jingïakhun bad ki samla (Youth Level) bad ïoh rah ruh ha ka kyrdan ba ar ha ka jingïakhun ha ka Women Senior Level bad ka national level pat ka la rung ha ka kyrdan ba ar ha ka jingïakhun ha Maharashtra da ka Maharashtra Armwrestling Association & Samta Sporting Club Nagpur.