Hadien ka jingkhang kali jong ka seng HNYF, ki la mih shibun ki jingïakren, ha kaba ïadei bad ka jingleit jingwan jong ki kali kiba na Assam sha ki jaka shangkai ba itynnad jong ka Ri Khasi, ba kynthup ïa ka Sohra, Dawki bad kiwei de ki jaka ba pawnam bad la ïohi ruh, ba kumno ki kynhun kiba kamai jakpoh na ka kam shangkai pyrthei, ba ki ïa mih ban kren pyrshah ïa katei ka jingkhang kali jong katei ka seng.
Ha kajuh ka por, ka don ruh ka jingïakynmaw baroh baroh ïa ka Sikkim, hana ba katei ka jylla, kam ju shah ïa ki kali kiba nabar, ba kin rung sha ki jaka shangkai bapher bad haba ïakren ïa katei ka mat, ka donkam shwa ban tip ba katei ka jylla ka ïasoh bad ka India ha u snem 1975 bad naduh utei u snem jong ka jinglong jylla jongka, la synshar da ki seng trai ri ïa ka Sikkim bad mynta ruh, uba long Myntri Rangbah, u dei na ka seng Sikkim Krantikari Morcha (SKM).
Ka jingdon briew ha Sikkim, ka long tang 6 lak ngut antad bad haba shu peit, la ïohi, ba kumba 75 percent ki nong Sikkim, ki shaniah ïa ka kamai kajih ha ka shang pyrthei.
Kumta ka jinglong jingman jong ka kam shang pyrthei, ka shong eh, ha ki kyndon ba la thaw da ki jylla bapher, namar ba ki nongleit nongwan lei ki wan shisien shi jingim bad kim da kwah than ban ïa tuklar ïa ka rung ka mih, hynrei ki kwah ban ïaid suk kynjai, ban biang ka leit ka wan, ka shong ka sah, ka bam dih.
Lada phai sha ka jylla Meghalaya ruh, ka shu mih ka jingkynthah jong ki nongkamai na kitei ki nongwan kai, namar ba ki shah bat ki kali kiba pynpoi ïa kitei ki briew, hynrei lada kitei ki nongwankai, ki wan noh da ki kali ML lane da ki kali WB lane da kino kino ki kali ruh, kim sngewpher satia, namar ba ki restaurant jongki, ki homestay jongki bad ki jaka leit kai jongki, ki dap briew beit; hynrei hangne pat ruh ka don sa kawei ka mat bad kata ka long, ba kumno te kitei ki nongwan kai kiba na ki ri sepngi kin wan poi ha Shillong, lada kim hiar khyndew ha Guwahati lane ki nong Kerala, Karnataka bad kiwei ruh ki hap ïaid hi na Guwahati bad kam dei tang kata, hynrei kine kiba shangkai, kim leit ruh tang ha kawei ka jaka, hynrei shisien ïaid ki kwah ban poi lut sha kylleng kane ka thaiñ.
Kumta haba shu peit na kitei ki jingshisha, lah i dei ba ka tnat shang pyrthei, kan ïaid da ka buit jong ka tnat rep bad kata ka long, ba kan leit pynïaid ïew ïa ka kam shang pyrthei sha ki ri sepngi lane sha ki nongbah ba heh jong ka India bad ba kin tip ban wad ïa ki trai shnong, haba ki kwah ban wan kai sha Ri Khasi.
Kumba la kren kham mynshwa, ka la dei ruh ïa ka tnat shang pyrthei, ha ka jingïatreilang bad ki dorbar shnong, ba kan sdang noh ha ki katto katne jaka, ban ailad da ki kali trai shnong, ba kin leit buh leit shaw ïa ki nongwankai bad lada katei ka jingpyrshang ka ïaid beit, kumta kin sa nang pynïaid sha kiwei pat ki jaka leitkai.
Ka jingshisha, ka long ba ki kali Assam, ki la bun palat than bad ki la pynthut ïa ka leit ka wan lada dei ha ki surok bah ne ki surok shnong bad wat ha ki lynti syngkien ha ki shnong ruh bad katei ka la ktah ïa ka jingshngaiñ ka leit ka wan da ki kali bad wat ïa ka jinglong kyrpang jong ki trai shnong ruh.
Lada mih ka jingkhang jubor pat ïa ki kali, ngi dei ban sngewthuh ba kiba bun ki nongpynïaid kali na Assam, ki la shu kaikhrong, namar ba kiba bun ki shim da ka ram ban pynïaid kali bad kaba bun ruh, ka dei ban kamai sha Ri Khasi bad kam dei tang katta, wat mangi ruh hangne, ngin nym long kiba jop, lada ngi shu khang jubor ïa ki kali Assam, hynrei ka donkam ban don ïa ki kyndon kiba biang ba kan don ka jingïahun lang bad ban nym mih ruh ka jingleh phoi ïa ki kali kamai jongngi kiba leit kamai man ka sngi sha ki dong bapher jong ka Assam.
Lehse la ïohi ruh ba la don katto katne ki briew kiba pynpaw ba naduh ba khang kali kamai tourist ka HNYF ki la pynpaw ba ka kam kamai lyngba ka jngohkai pyrthei ka la hiar arsut hynrei lah ruh ban ong ba kin lah ruh ki briew ki ban shim kabu na kane ka jingleh katei ka seng, khamtam eh ki briew ki bym dei trai jylla ban shu pynbna jubor halor ka jinghiar ka ïew ka hat ha ki jaka jngohkai pyrthei ka jylla.
