Ha u Divider ka surok 4-lane leit tynrah ka trok khlem don ba mynsaw

Nongpoh, Nailar 04: Ha kawei na ka jingjia ryngkhat, ha ka sngi U Blei, kawei ka trok katba ka dang wan na Khanapara ban kiew sha Shillong ka la tynrah ia u Divider ha surok 4-lane ha Ri Bhoi bad hadien kata ka sa leit tynrah ia ka kynroh.

Kumba la ioh lum jingtip, kane ka la jia ha ka por 1.50 noh sngi ha Narang kaba don ha syndah ka khyrdop khrong khajana ka sorkar, ha kaba ka trok kaba don ia u number ML 05 AA 0501, kaba la niah da u Bhi B. Kunwar uba dei na Jhalupara, Shillong ka la leit ban tynrah ia u Divider kaba dei ha ka por ba u dribar um poi pyrkhat satia.

Halor kane ka jingjia, ki Pulit na Byrnihat Police Outpost tang shu ioh jingtip ki la leit ban jurip bad lap ba ym shym la don ba  mynsaw bad lait noh ka jingjulor na ki bynta ba shakhmat jong katei ka Trok.  La iathuh ruh ba kane ka jingjia ka dei tang na ka daw ka jingshoh samthiah jong u nongniah kali bad ha ka por bym poi pyrkhat u la leit ban tynrah ia u Divider ka surok 4-lane.  Ia kane ka trok la tan noh sha Byrnihat Police Station.