Shillong, Nailar 04: Ka West Jaintia District Sports Association ka la long ka synjuk kaba seisoh tam ha ka wat ïakhun ba lai jong ka Meghalaya Youth League 2024, da kaba jop ha baroh ar tylli ki kyrdan ïalehkai (U-14 bad U-16) hadien ba jop kput ïa ki jingïalehkai ba la long ha ka Sngi Saitjaiñ.
Ka WJDSA kaba pdiang ïa ka Laskein Block Sports Association bad ka la jop ïa ka jingïalehkai kyrdan U-16 da 5-1 kol shuwa ban jop kput da 12-0 kol ha ka kyrdan lehkai U-14 ha Jowai’s Kiang Nangbah Stadium. Ka jingïakhun ha ka Under-14 la sakhi ïa ar tylli ki hat-trik lyngba u Ram Passah bad u Kaisarmi Dkhar. Hadien ar tylli ki jingïalehkai ha baroh ar kyrdan, ka WJDSA ka dang lamkhmat ïa ka Zone B da 6 point ha baroh ar tylli ki kyrdan.
Katba ka Ri-Bhoi District Sports Association, hadien ba ïakhun sa kawei ka jingïalehkai, ka la kylla long ka kynhun ba nyngkong ban khur 9 point ha ka U-16 hadien ba jop da 5-0 kol ïa ka Western Ri-Bhoi Sports Association na ka Zone C ha Umdihar Mini Stadium. U Me-u-ba-ai Sumer jong ka RBDSA u la nang kiew kum u nongthep kol ba bun tam ha kane ka kyrdan hadien ba thep lai kol ïa ka Western Ri-Bhoi, kaba kyntiew 5 kol ïa u mynta.
Ha ka U-14, ïa kaba ka RBDSA kam shym la ïakhun mynta ka taïew, ka Pyndengumiong District Sports Association ka la long ka kynhun ba nyngkong ban kynjoh 9 point naba jop salit da 1-0 kol ïa ka Nongstoin District Sports Association na ka Zone D ha Dommawlum Playground ha ka jingïalehkai kaba itynnat hapdeng ki kynhun ba khlaiñbor jong kane ka group.
Bad ruh ha ka Zone D, ka Mawshynrut Sports Association bad ka Tyrsad Area Sports Association ki la ïakhun pyrshah ha Riangdo Playground. Baroh ar kynhun kim pat shym la ïoh pynkhihjar ha ka U-14, bad kane ka jingïakhun kadei ka kabu ïa ki ban khur ïa ki lai point ba pura. Ha kaba kut, ka Mawshynrut ka la lah ban jop da 3-1 kol, katba ha ka kyrdan Under-16 ki la ïakhaid da mar 2-2 kol.
Haba phai sha kiwei pat ki jingïakhun, ha ka U-16 bad U-14: Na ka Zone A – ka North Garo Hills DSA ka la ïakhaid mar 1 – 1 kol bad ka Tura DFA ha Resubelpara Mini Stadium, katba ha ka kyrdan U-14 ka la jop da 2 – 1 kol.
Nangta na ka Zone B – ka Amlarem Block SA ka la ïakhaid da mar 2 – 2 kol ïa ka Saipung Block SA ha Ladjaplem Football Ground, katba ha ka kyrdan u-14 ki la ïasam mar shi point naba la pynsangeh ïa ka jingïakhun.
Ha baroh ar tylli ki jingïalehkai U-16 bad 14 na ka Zone C – hapdeng ka Sohra SA bad ka Riwar Mihngi FA, baroh ar kynhun ki la ïoh ban ïasam mar shi point hadien ba la pynsangeh ïa ka jingïalehkai ba la thmu pynïakhun ha Mawparo Football Ground.
Ha ka Zone D – ka Pyndengumiong DSA ka la ïakhaid da mar 2 – 2 kol bad ka Nongstoin DSA.
Ha kane kajuh ka Zone, ka Eastern Border SA ka la jop da 3 kol ïa ka Mawkyrwat DSA ha Dewbyrtha Playground. Hynrei ha ka U-14 ka jingïakhun la pynsangeh ha kaba baroh ar ki la ïasam mar shi point.
