Ngin buddien biang ïa ka ILP bad ka jingpynrung ïa ka ktien Khasi bad Garo ha ka Khyrnit ba 8 : Prestone

0

Shillong, Rymphang 5 : U National Vice President ka National People’s Party (NPP) uba dei ruh u Symbud Myntri rangbah ka Jylla, u Bah Prestone Tyngsong u la ong ba ka NPP kan buddien biang ïa ki resolution ba la mynjur hapoh ka ïingdirbar thawaiñ, ba kynthup ïa ka jingdawa ban pyntreikam ïa ka Inner Line Permit (ILP) bad ban pynrung ïa ka ktien Khasi bad Garo hapoh ka Khyrnit ba Phra jong ka Riti Synshar ka Ri India.
“Ngi la buh ïa kine ki mat ha ka manifesto bad tang shu jied biang ki paidbah, ka NPP kan buddien biang ïa kine ki mat,” ong u Bah Prestone.
Ha kaba ïadei bad ka jingpynbna ka All India Trinamool Congress (AITC) ha ka kular election ban pyndam noh ïa ka soskular ne ka Memorandum of Understanding (MoU) pynbeit pud lada ka wan ha ka bor, u nongïalam ka NPP u la ong ba ka jingkwah jong ka Trinamool Congress ban pyndam ïa ka MoU ka pynpaw ba kim don jingsngewkhia ïa kane ka mat kaba la sahteng la slem, bad bynrap ba ki paidbah kin sa ai ka jubab ïa ki.Halor ka jingshah kynnoh bamsap da ka AITC ïa ka Sorkar Meghalaya Democratic Alliance (MDA) ba ïalam da ka NPP, u bah Prestone u la ong ba mano mano ruh ki lah ban kynnoh, bad ki lah ban pynmih ïa ki jingkynnoh ruh tang ban pynkulmar ïa ki paidbah.
“Lada phi don shisha ïa ki sakhi sabud balei phim leit beit ha ka aiñ, lada don haduh katta ki jingkynnoh pyrshah ïa ka Sorkar ba ïalam da ka NPP, sngewbha leit katkum ki kyndon jong ka aiñ namar yn nym lah ban buhrieh eiei lada don kum kita ki jingkynnoh” ong biang u bah Prestone.
U nongïalam ka NPP u la ong ruh ba ka Sorkar ba ïalam da ka NPP ka la pyrshang katba lah ban leh ïa bun kiei kiei bad kan bteng ban leh na ka bynta ban pynurlong ïa ka jingangnud u paidbah.
Haba jubab halor ka jingkynnoh jong ka Trinamool Congress ba ka NPP ka la wanrah ka jingïapher jaidbynriew da kaba kynnoh ba ka AITC kadei ka seng ‘Bengalee’, u Bah Prestone u la ong kadei ka jingshisha ba ka Trinamool kadei ka seng na West Bengal, bad u Dr. Mukul Sangma u la leit rung sha kata ka seng.

Leave A Reply

Your email address will not be published.