Ki kam kiba nga la trei kum u MLA kin kren kham jam ban ïa ki jingkynnoh : Banteidor Lyngdoh
Shillong, Rymphang 05 : U Bah Banteidor Lyngdoh, uba dang pynkhreh ïalade ban shah jied biang kum u MLA ka Mawkynrew Constituency ha ka elekshon MLA 2023 ka ban long ha ka 27 tarik mynta u bnai Rymphang, u la ong ba um kwah ban pynphai nia ïa ki jingkynnoh ne jingkynthoh na ki liang ba pyrshah ïa u namar u ngeit ba ki kam kiba u la leh ha ki san snem ba la dep ki la kren kham jam ban ïa ki ktien jingkynnoh bad ïa kane la sakhi ruh da ki paidbah ka Mawkynrew Constituency.
Kane ka jingkren une u kyrtong ka People’s Democratic Front (PDF) ka la long ha ka jingïalang kynduh lang ki nongkitkam na ki Unit bad Circle bapher bapher ka PDF Zonal Committee Mawkynrew Constituency ha Thangsning myn ha ka 04 tarik u Rymphang, 2024 ha kaba la pdiang burom ïa ki riewrangbah bad nongkitkam na kiwei ki seng saiñ-hima katei ka Constituency kiba la wan pynïasoh sha ka PDF.
“Ngam don eiei ban kynthoh kylla namar nga la leh bun ki kam kiba ki paidbah ka Constituency hi ki sakhi bad na kine ki kam kin sa shim ka rai ba kin jied biang ïa nga ha kane ka elekshon ban wan”, u la ong da kaba bynrap ba ma u bad ka ïing jong u kam shym la iehnoh ban shakri ïa ki paidbah ka Mawkynrew Constituency naduh ba u dang long tang u MDC naduh u snem 2014 haduh kine ki sngi.
Da kaba pynpaw ba ka jingjop ïa ka elekshon MLA 2018 bad da jingïoh ban bat ïa kam Myntri ha ka Sorkar Meghalaya Democratic Alliance (MDA ka la plie lynti ïa ban kyntiew ïa ka thaiñ ha bun ki liang, u la ong, “Nga la shakri da ka jingïatreilang bad phi bad ngam dei ban ong ‘ma nga’ hynrei ‘ma ngi’ hi ngi la ïaleh ban wanrah ka jingmyntoi sha ki shnong bapher bapher “.
Halor ka jingwan ai jingkyrshan da ki riewrangbah na kylleng ki shnong ka Constituency u la ong, “Ha nga hi ym don barim ne ba thymmai bad ki nongkyrshan ki kyrshan da ka jingieid bad nga ruh bad ka ïing ngi la ai ka jingshakri kaba kylluid mynsiem ïa baroh lang. Ngin ïatreilang bad pynlong ïa ka Constituency kaba kiew shuh shuh na kaba long mynta bad hap ban ïa pyrkhat ruh ïa ka suk ka saiñ ki pateng ban wan”.
La wan ban sakhi lang bad ai jingkren ha ka jingïalang da ki nongïalam ka PDF Central Executive Committee ba kynthup ia u Bah Auspicious Lyngdoh, General Secretary, u Bah James Ban Basaiawmoit, Vice President, u Bah Elezar Chyne, President People’s Democratic Youth Front ha ka jingïadon lang ki riewrangbah bad nongkitkam na ka PDF Zonal Committee Mawkynrew Constituency bad na ki Unit bad Circle bapher bapher, ki longkmie longkpa, ki samla lem kiwei pat.