Ka BJP ka dei ban pyrkhat ar sien shwa ban khot ïalap elekshon ïa u Modi bad u Amit Shah : Vincent Pala

Shillong, Rymphang, 05: U nongïalam jong ka Seng Congress u Bah Vincent H. Pala u la ong ba ka BJP ka dei ban da pyrkhat shwa arsien shwa ban wanrah ïa u Myntri Rangbahduh ka ri u Narendra Modi bad ïa u Myntri ka tnat Kam Pohing u Amit Shah na ka bynta ban ïalap elekshon ha kane ka jylla ka ban sa long ha ka 27 tarik, Rymphang, 2023.
Haba pynpaw ba ki paidbah jong ka Jylla Meghalaya kim don shuh ka jingshahniah ïa ka BJP, u Bah Pala u la ong, “kaei kaba ka BJP ka la leh ha Assam ïa ki Khristan, kaei kaba ka BJP ka la leh ha kiwei kiwei ki jylla la ka long ha Maharashtra, Madhya Pradesh, Karnataka, nga tharai ha Meghalaya kaba don 78% ki Khristan na ka jingdon jong ki nongshong shnong bad lada phi peit ïa kito ki rekod lada phi wanrah ïa u Modi bad ïa u Amit Shah kan bha ïa ka BJP ba kan pyrkhat arsien.”
U la ong, haba u Myntri Rangbahduh bad u Myntri ka tnat Kam Pohing ki wan sha Shillong, ki wan tang ban pyllait skhim bad ïa ki prokram bapher bapher ka Sorkar ym ban ïakren politik
U Bah Pala u la ong ba ka rai jong ka BJP ban wanrah ïa u Myntri Rangbahduh bad u Myntri ka tnat Kam Pohing kum ki nongïalap elekshon ba hakhmat eh kan ym don jingmut eiei ha kane ka jylla. U la kynnoh shuh shuh ba ka BJP kan ym nud ban wanrah ïa u Modi ha ki jaka ba ki paidbah ki duna namarba ka pynlehraiñ hi ïa ki.
Une u nongïalam ka Seng Congress u la ong, ha ka elekshon kaba la long ha u snem 2018, u Myntri Rangbahduh ka ri um shym la wan iuhkjat ha rilum Khasi bad Jaiñtia hynrei u la leit tang sha rilum Garo “namarba ka party ka la wanrah ïa ki briew na Assam.”
“Kin sa leit sha ki Constituency kiba don markhap bad ka Assam khnang ba kin dup pyni ïa ka jingbun briew. Ka jingbun ki briew ha ka jingïalang kam lah satia ban pynkylla sha ka vote,” u la bynrap.
U la ong ruh ha ka elekshon baladep, haba u Myntri ka tnat Kam Pohing u la leit ïashim bynta ha ka jingïalang kaba la long Malki ki paidbah ki duna haduh katta katta.
Na ka liang jong ka Congress ka la tyrwa ban wanrah 40 ngut ki khlur ïalap elekshon ha kane ka kynti. Na kine, u Rahul Gandhi, ka Priyanka Gandhi, u Shashi Tharoor ki dei ki nongïalam ka party ka la tyrwa.
“Ngin dang pynbeit ïa ki kyrteng jong ki khlur ïalap elekshon……bad la kumno kumno kin poi haduh 40 ngut, 20 na Meghalaya bad 20 nabar ka jylla Meghalaya,” u la ong haba pyntip ba ka party kan sa pyllait paidbah ïa ka election manifesto la kumno kumno ha ka 9 tarik lane 10 tarik mynta u bnai.