Shillong, Rymphang 5 : Ha ka Sngi Thohdieng ka National People’s Party ka la pyllait paidbah ïa ka manifesto jong ka kaba la ai kyrteng People’s Document : Vision 2023-28. Kum ban shu pynkynmaw, u President jong ka NPP, u Conrad Sangma dang shen u la pyllait ïa ka document “Report Card to the People” ha la 12 tarik Kyllalyngkot 2023 kaba la thoh ïa ki kam kiba ka sorkar MDA hapoh ka jingïalam ka NPP ka la leh hadien ka election jong u snem 2018, bad kaba itynnad ka long ba ha ka taiew kaba bud, u General Secretary ka AITC, u Abhishek Banerjee u la aireng ïa ka NPP ban pyllait ïa ka report card kaba 5 snem bad ban pyllait ïa ki 10 tylli ki mat treikam ha ka jylla Meghalaya.
Katba ka AITC ka kham pynleit jingmut tang ha ka kam pisa kum ka We Card na ka bynta ki longkmie, ka MYE card na ka bynta ki samla, ki scheme sam pisa ki bapher bapher, ka NPP ka ïaid shakhmat da ka jingsam pisa bad kam pynïar ïa ka ïoh ka kot.
Haduh 5 lak ki kam ban ailad ïa ki samla ban seng kam lajong, ki Village community facilitators employment na ka bynta 6,500 tylli ki shnong, 1,000 ki CM facilitation centre na ka bynta ki jingtreikam ka sorkar, FOCUS & FOCUS+ schemes, prime hubs, CM village connectivity scheme na ka bynta ban pynheh bad pynbha ïa ki surok, ban pynkhlaiñ ïa ki kam lehkai, ban pynkhlaiñ ïa ka rep ka riang, ban shna ia ki jingkieng, kad liengsuin, bad ban kyntiew ia ka thoh ka pule ne jingnang jingstad.
Ki 10 tylli ki jingkular jong ka AITC ka dei tang halor ka jingsam pisa kaba la pynïaid na West Bengal bad ka AITC ka ngeit ba kine ki 10 tylli ki jingkular kaba la wanrah jingjop ïa ki ha West Bengal kan urlong ruh ha ka jylla Meghalaya.
U bah Bajop Pyngrope, uba dei u Secretary ka NPP bad NPYF u la ong ba ka manifesto jong ka TMC kam long eiei hynrei kadei tang ka jingkular kiba thylli khlem kano kano ka nongrim bad kim don kano kano ka jingmut ban pynkylla ha ki jylla kynthup ïa ka Meghalaya.
U la ong ba ki “Baaki” Card kim dei eiei hynrei kidei ki pisa thied vote bad ki ïaleh ban pynlong ïa ka Meghalaya kum ka West Bengal ha kaba ki nongshong shnong baduk ki ap tang da ka jingisynei ki nongtrei ka TMC na ka bynta ki scheme sorkar. Ki nongshong shnong ka Meghalaya ki la ïoh mad ïa ka kam babha kaba ka sorkar ka la ai mynta la 5 snem ban kan nang trei kham bha shuh shuh.
Ka kong Ampareen Lyngdoh, kaba dei ka nongaiktien ka NPP bad ka kyrtong na East Shillong ka la ong ba ka manifesto jong ka TMC ka bun tang ki kular kai. Ka duna palat ha kaba ïadei bad kino kino li jingai jingmut ban pynduh ïa ki issue kiba ka jylla ka don. Ka TMC ka kwah ban ïalam ïa ka Meghalaya sha ka 30 snem mynshuwa kumba ki leh ha West Bengal. Ka manifesto jong ka NPP ka wanrah ïa ki jingtreikam kiba la trei bad kan nang trei bha ha kine ki 5 snem ban wan.
Ha ki artylli ki manifesto, ki paidbah ka jylla Meghalaya ki ïoh artylli ki mon, kawei ka long ka kam ba ïadei bad ka roi ka par bad kawei ka long ka pisa. Baroh ki ong ba ka jingkyntiew ïa ka roi ka par ka shimpor 4 lane 5 snem ban pynkiew ïa ka jylla bad kawei pat ka long ban pynkylla ïa ka sorkar sha ka kam sam pisa da kaba lum khajna bad ban pynbiang ïa ka jingsam pisa.
