Ha ka bamsap ka Meghalaya ka long Number One, kiwei ki kam pat sha tdong: Bah M. Kharkrang

Shillong, Rymphang, 05: U Kyrtong ka BJP na North Shillong Constituency u Bah M. Kharkrang u la ong ba ka Jylla Meghalaya ka long kaba nyngkong tam ban paw ha ka jyrsieh bamsap, katba kiwei kiwei pat ki kam pynroi ki paw sha tdong.
U Bah Kharkhrang uba long u Pulit Ophisar ba la shongthait u la sdang ïa ka jingïalap elekshon jong u na Khasi National Dorbar Hall, Mawkhar ha ka sngi Saitjaiñ hadien ba u la ïoh ïa ka tiket ban ïakhun ïa ka elekshon na ka Bharatiya Janata Party na North Shillong Constituency.
“Dei lyngba ka sorbe ba nga la ïoh ïa ka tiket. Shwa ba phin thep ïa ka vote ngi la jop lypa,” ong u Bah Kharkhrang.
U la kynthoh ruh halor ka jinghiar ka pule ka puthi bad ka jingbym ïohkam ïohjam jong ki samla kiba la nang la stad kiba la pyndep wat ïa kyrdan pule kiba heh.
“Dei tang ki nonghikai ha kane ka jylla jong ngi kiba hap ban thiah miet ha surok ban ïoh ïa ka tulop jong ki. Shi bnai kynthih ki bapli ki thiah hapoh surok kin sa ïoh ïa ka tulop,” la pynkynmaw u Bah Kharkrang ïa ki jingïakhih jong ki nonghikai skul kontrak, Adhok bad ki nonghikai skul SSA dang shen.
Haba kynthoh ïa ka jingkular jong ka National People’s Party (NPP) ban pynkha 5 lak tylli ki kam bad ka jingkular jong ka All India Trinamool Congress (AITC) ban pynkha 3 lak tylli ki kam, u Bah Kharkrang u la ong, “hynñiew hajar tylli ki kam kiba thylli mynta la san snem ki khlem pyndap, phi kren ïa ki kam da ki lak tylli ban pynmih. Naei phin pynmih ïa kata ka kam? Hato u paidbah jong ngi u biej haduh katno eh haba hynñiew hajar tylli ki kam phi la don ha kti phim treh ban pyndap nalorkata phi kular ban pynmih pat da ki lak tylli ki kam. Hato ka dei kata ka manna na bneng kaba shu hap? Balei ki kren kumta, ki san snem, ki shiphew snem bad ki khat san snem kiba la leit kajuh shi kajuh ki kren.”
U la kynthoh ruh ïa ka jingbym biang ki tiar ai jingsumar ïa ki nongpang ha ki Hospital khamtam kum ka Ganesh Das Hospital.
“Lada 813 klur la pynlut ha ka jingpang khlam Covid hynrei haba nga kylli ïa kiba thiah pang ha hospital ki ong ba ki hap ban siew shi lak tang ka bai thiah pang namarba ka sorkar kam shym la ïarap eiei ruh em,” u la ong.
U la ïathuh ruh ki don kiba la khñium ba kim pat ïoh satia ïa ka pisa ba ka Sorkar ka la shim wai ïa ka kali jong ki bad don ruh kiba trei ha ki Covid Centre haduh mynta kim pat ïoh.
“Mano ba ïoh ïa kata ka pisa, dei tang kito kiba ai ïa ka Bill kaba 50 klur, 100 klur, kito ki ïoh lut, ki ai mynta ka Bill, lashai ka sngi ki la ïoh lut ïa ka pisa jong ki. Kata ka dei ka sorkar jong ngi. Ngam kwah ban kynthoh ïano ïano ruh hynrei ka kthang ka mynsiem lada nga ïohi kumne ban shu pynsyrwa ïa ka pisa kaba la ai na ka Sorkar Pdeng. Jin lada ki la pyntreikam hok ïa ka pisa, ka jylla jong ngi kan jin ym da long kumne,” kren bynñiaw u Bah Kharkrang.
U la ong ruh haba u wad ïa ka daw halor ka jingbym kiew jong ka jylla Meghalaya ka dei na ka daw ka jingbamsap. “Lada kan long shi ïai long kumne ka jylla jong ngi lada theh da ki hajar klur ruh ka jylla jong ngi kan ym roi satia,” u la bynrap.
“Ka Sorkar ka ong ba ym don trok ba kit dewiong hynrei haba ka kylla ka trok kaba kit dewiong pat u mih naei u dewiong?” la kynthah u Bah Kharkrang.
Haba ïaroh ïa ka pynmih hukum jong ka Iingbishar Meghalaya High Court, “nga la long SP ha West Khasi Hills san snem, nga tip bha shaphang ka Shahlang. Hynrei haduh 61 tylli ki Coke Factory ki don hangto bad lada ki treikam lut baroh ki briew kiba sah hangto tang ar snem ki la ïap lut na ka tdem kaba mih nangto. Tad haduh ba la pynmih hukum ka High Court la lap ba 57 tylli ki dei kiba beaiñ bad tang 4 tylli kiba ïaid da ki kyndon aiñ. Sa tang ka sorkar aiu ka bym ïohi ïa kata?”
Ka jingdon jong ki Coke Factory ha Shahlang ka la pynduhnong ïa ka jingïoh khajna jong ka Sorkar Jylla namarba ba ki trai karkhana ki pyni ba ïa u dewiong la wanrah na Nagaland bad Assam. “Ïa ka GST ki trai karkhana ki siew sha ka Sorkar Nagaland bad Assam, hynrei wat tang shi belsha ruh u dewiong um shym la wan na kine ki jylla. Dei na kane ka daw ba ka jylla ka duh ïa ka khajna,” u la bynrap.
“Ka kaiphod CAG 2019-2020 ka ong ba ka Sorkar kam shym la lah ban jubab halor ka jingjah ka pisa T. 1165 klur. Sa katno ngin lah ban ïai shah,” la kynthoh u Bah Kharkrang.
Shuh shuh u la ong ba ka jingbym don ka polisi, ki kam jngohkai pyrthei ha kane ka jylla Meghalaya ka la pynduhnong haduh katta katta katba ka Assam ka la nang kiew artet.
“Lada phi ong ïa ka pule puthi, ka koit ka khiah, ka ïohjam ïohjam ngi dei kiba shatrai eh. Hynrei ha ka bamsap ngi long kiba nyngkong eh,” la kynthoh u Bah Kharkrang bad ong, “lehraiñ ban ong ba ngi dei ka Jylla Khristan. Ki tuh kiba najrong tangba ïa ki pop phi hap ban kit lang ma phi baroh (ki paidbah).”
U la kyntu ïa ki paidbah ban pynjop ïa ka BJP ha kane ka kynti khnang ba ka jingkylla kan wan ha kane ka jylla Meghalaya kumba long ka Jylla Assam kaba la nang kiew irat manla ka sngi ha ka roi ka pa.