Rah ki pulit ïa u President ka JCMSWA shabar khyrdop ka ophis u DC EJHs. District

Khliehriat Jylliew 01: U President jong ka Jaiñtia Coal Owner, Miners Supplier and Workers Association (JCMSWA), u bah Marshal .S.B.Biam katba u dang bteng ïa ka jingiakhih da kaba shong shah thngan ha trai u mot Kiang Nangbah hajan ophis u DC ha Khliriat, ha ka por kumba 6.40 janmiet ki pulit ki la wan bad rah jubor noh ïa u shabar ka khydop ophis DC bad ki pulit ki la pynmih ruh ïa ki dkhot ka JMCSWA kiba dang ïa shong shah tnngan lang bad u President.
Kane ka jingiakhih shong shah thngan ka dei halor ka nongrim ban pynsngew sha ka sorkar ïa ki jingeh ba ki paidbah ka East Jaiñtia Hills District ki iakynduh naduh ba shah khang ban tih dewïong kata naduh u snem 2014, ha kane ka jingiakhih la wan ruh ban ai mynsiem ïa u President ka JCMSWA da u President jong ka HNYF East Jaiñtia Zone, u bah S.Ryngkhlem, ka President jong ka Meghalaya indeginous women’s council (M. I. W. C), ka kong Bythygrace Dkhar.
Haba kren sha ki pathai khubor ka kong Bythygrace Dkhar bad ki dkhot ka JCMSWA ki la pynpaw ba ki la iakynduh jingeh haduh katta katta naduh ba khang ban tih dewiong.
Kumjuh ruh u bah Marshall Biam hadien ba la pynmih noh shabar ka khydop jong ka ophis u DC, u la shong beit hakhmat ka khyrdop ha rud surok lem bad ki dkhot bad u la ong ba un nym pynkut ïa kane ka jingiakhih katba ka sorkar kam pat plie ïa u dewiong.
Ha kajuh ka por u bah Marshal Biam, u pynrem jur ïa ka jingleh ki bor pulit kiba la tan jubor ïa ki dkhot shabar ka khydop bad ong ruh ba ka aiñ kam shah ban shu leh bor kumto “Balei ki pynmih ïa ki shabar balei kim kren shwa da ka ktien” ong u bah Mrahsal Biam.
Na ka liang u President ka HNYF East Jaiñtia Zone, u bah S,Ryngkhlem u la ong “Na ka liang ka seng ruh ngi sngewthuh bad ngi la iohi ba haduh katno ki paidbah ki mad jingeh naduh ba shah khang ban tih bad shalan dewïong, kane ka la ktah ruh khamtam ïa ki khun samla namar ha kito ki por ba la leit ki dei ki briew kiba na bar jylla kiba wan ban wad jingbylla shane hynrei mynta pat da khongpong ha kaba kiba bun ki khun samla ki hap ban mih shabar ban leit wad jingrei sha ki jylla ba shabar” ong u bah Ryngkhlem bad ha kajuh ka por u kyntu ïa ka sorkar ba kan shim khia ïa kane ka kam dewïong ban wad ki lad ki lynti ban ioh biang ban trei dewïong kumba ju long ha kito ki por ba la leit.