Wat balia sha Constituency kiwei bad ki ktien kynnoh khlem nongrim kin sa kyrñiom kylla : Nongïalam ka PDF

Shillong, Rymphang 05 : Ki nongkyrshan ka People’s Democratic Front (PDF) na Mawkynrew Constituency ki la ther tyngeh ïa u nongïalam ka National People’s Party (NPP), u Bah Prestone Tynsong da kaba kynnoh ba une u nongïalam u la wan ban ïalam bakla ïa ki paidbah ka Constituency tang ban myntoi saiñ-hima u kyrtong jong ka NPP kata u Bah Kansing Lynshiang.
Ki nongïalam bad nongkyrshan u Bah Banteidor Lyngdoh kiba la ai jingkren ha ka jingïalang ïakynduh lang ki nongkitkam na ki Unit bad Circle bapher bapher ka PDF Zonal Committee Mawkynrew Constituency myn ha ka 04 tarik u Rymphang, 2023 ha Thangsning ki la ong ba kim sngew lah shah ba kiba na bar Constituency kin wan balia bad kynnoh ïa u MLA jong ki khlem nongrim.
U Bah Harkin Warjri, Sordar ka shnong Thynroit, u la ong ba la thait ban kren ïa ki jingkam ei kiwei pat halor ka jingjop ki nongrep ïa ka jingïakhun pyrshah ïa ka rai khang pyndonkam dawai sboh. “Ka dei ka jingshim khia u Bah Banteidor kum u Myntri bad ki jingshisha ki don kumba la paw ha ki lad pathai khubor ba u Bah Banteidor u la leit ïakren shaduh ki bor bahalor ka Sorkar India sha Delhi ban pyllait noh ïa ka bhah dawai sboh sha ka Jylla”, la ong u Bah Harkin.
U la ong ba ynda la jop u Bah Banteidor bad ki nongrep la don pat sa kiba kam ei bad u Bah Prestone u bishni ïa ki kam ba bha ba leh kiwei. U la buh jingkylli ruh ba u Bah Prestone u la kynnoh ba u Bah Banteidor u plie mawnongrim khlem mang tyngka ïa ki jaka ai jingsumar ha ka Constituency katba ma u pat kat u nongïalam u dang hap wan thep kyrteng ïaleh elekshon shaduh Shillong kaba pyni ba ka Pynursla Civil Sub-Division kam pat treikam bad don tang ka shynrong naduh u snem 2017.
Na ka liang u Bah Olet Kharsahnoh, kyrtong ka Congress ha ka elekshon MLA 2018 na Mawkynrew Constituency, uba la shim ïa ka rai ban kyrshan noh ia u Bah Banteidor Lyngdoh, u la kynther tyngeh ia u Bah Prestone Tynsong da kaba kynnoh ba u Bah Prestone u la pyrshang ban ïalam bakla ïa ki paidbah ka Mawkynrew da kaba kynnoh laiphew jait ïa u Bah Banteidor.
“Ka jingkynnoh da u Bah Prestone ba u Bah Banteidor u la plie mawnongrim ban kyntiew kyrdan ïa ka Jongksha PHC sha ka CHC khlem ka mang tyngka ka dei hi ka jingthok ka NPP namar ba u Myntri Rangbah ka Jylla, Conrad K Sangma u la dep kular ïa ka ban kynthup ïa ka surok na Jongksha sha Thynroit ha ka sngi plie ia u mawnongrim ka Indoor Stadium ha Jongksha”, la ong u Bah Olet.
Halor ka dawai sboh u la ong ba don ki briew kiba long kum ki tham kiba kwah pynjah burom ïa u Bah Banteidor tang ban da ïa ka burom jong ki. “Ha Mawkatheiñ la pyllait paidbah ïa ka dawai sboh da u Bah Banteidor kum u Myntri ha ryngkat ki ophisar ka tnad kam rep”, la ong u Bah Olet da kaba pynpaw ba kiwei pat ki wan pynbieit ïa ki nongshong shnong kumba ong u Bah Prestone ba ki pynbieit man ka san snem.
U la kynnoh ba u Bah Prestone ai ïa ka surok na Jongksha sha Thynroit namar u tieng ïoh ba ka burom kan dei jong u Bah Banteidor. “Kynmaw Bah Prestone ki kyntien pynrem jong phi ïa kiwei khlem nongrim kin sa kyrñiom kylla ïa phi hi”, la ong u Bah Olet da kaba ong ba u Bah Banteidor un jop ha kane ka elekshon bad yn sa pynurlong ïa kane ka surok nalor kiwei pat kiba la pyndep ha kane ka samoi 2018- 2023.
Kiwei ki nongkren ki la ong ba u Bah Prestone ba um dei ban balia palat sha Constituency jong kiwei namar ynda phai sha Pynursla lah ban ïohei da kiwei pat. Ki la pynpaw ka jingbitar bad ong ba ki jingkren u Bah Prestone ki dei ki jingkren khyllung khynnah bad ki bym dei ban mih na shyntur jong u kum u nongïalam khamtam ka jingkam ba yn pynshong tnum bos ia ki party ba rit.
Ki la ong ba kaba lyngngoh ba ki nongïalam na kiwei pat ki seng ki ong ba u Bah Banteidor u la hiar na kylleng ki jaka katba da pan ban shu ïakob ïathong pat ym don ba nud bad kane ka pyni ba u kyrtong jong ki na ka PDF un dang jop suk ha kane ka elekshon ban wan namar ki kam kiba u la leh ban kyntiew ïa ka roi ka par ha ka Constituency hi baroh kawei.