KA ÏTKHMIH : Hadien 20 snem pynim biang ka shnong Umkaduh ïa ka rep Krudkba – H.T.Wells

Ka Ri Bhoi ka dei kawei na ki district ha Meghalaya kaba dang riewspah shisha ha ka deiriti, la ka long ha ka put ka tem, ka rwai ka siaw ne ha ka shad ka mastieh. Ha kine ki khyndiat snem na ka Team u Mawphor hapoh ka jingïalam jong u nongthoh, la ïoh ban leit tyur ïa ki riewdonsap jong katei ka thaiñ. Ban tip khambha, sa shisien la leit biang sha shnong Umkaduh, Raid Nongsohbar ha ka sngi Thohdieng 29.05.2026, ka shnong kaba jngai kumba 12 kilometre mihngi na ka sor Nongpoh, ban sakhi ïa ka rukom repkba ‘yonglang’ (community works) kaba la duh la kumba 20 snem ei ei.
U Bah Phras Syngkli u kaitor bapaw jong katei ka shnong, u la wer ïa ki nongshongshnong jong ka Umkaduh kumno ban pynkhie im biang sa shisien ïa ka rukom rep shyrti kumba leh ki longshwa manshwa, kaba ki khot ha ki thaiñ Ri Bhoi kum ka rep Krudkba.
La shim bynta da ki spahngut ki samla kynthei bad shynrang, ki longkmie longkpa bad ki riew rangbah kiba bat ïa la ki mohkhiew ban krudkba ha u lum jong I kong Spildaris Sylliang ha Umjasu kaba jngai tang kumba 1 km na Umkaduh. La kerkut ïa kane ka jaka da ki lum ba itynnad ba ïasohlang kum u lum Mawlyngkor, lum Mawthadphong, lum Mawblang, Lum Mawkrai, lum Mawspong bad ki Khyndai Umtong. Ki paidbah jong ka shnong ki la ïeng shriak na trai jong ka lyngkha lum naduh 9:30 mynstep haduh 6.00 baje janmiet, La lamkhmat da u Bah Phyrnai Makri, u nongbet symbai uba la nangjam shakhmat ryngkat bad ka khoh-kit symbai kaba jrong tang shipruh bad shiphut pyllun ka jingheh ïa kaba ki tymmen ki khot kum ka ‘Khohkeiñ’. Hadien jong u, bud ki nongkrudkba kiba puh mohkhiew laisien puh ha ka shisien sawa ka ksing, bud sa ki nongpynpra stong, nangta, sa ki samla kynthei bad ki longkmie ban tam ïa ki ñiut ki ñier bad ban lumthup ha trai jong ki diengdyngkhong. Kumta, ka jingkrudkba ka long lai syrtap.
U Bah Phras Syngkli, u shim ïa ka bynta kum u Duhalia ban tem ksing bad la ïarap tem da u Bah Ebinus Syngkli u hymen jong u Bah Phras hi ryngkat bad phawer artet da ka jingpynhap sur, ha kata ka rukom pah ka ksing kdom ! – bud sa ki mohkhiew chrap chrap chrap!. Ha kane ka jingtrei, ka phang ka ïaid da ka jingtehlakam jong ki rangbah ba la jied kyrpang ba la tip kum ki ‘Swait’ ban ‘harai’ ïa ki paidbah (harai, ka mut ban hukum ïaid sha ka mon ïaid sha ka diang, shadien ne shakhmat katba shah ka kam). Kine kin peit nangno ban trei shano ban lam. Hangne la jied ïa I Bah M. Makri, Bah Kriton Jynthem, bad i Bah Isaiah Makri. Ka jingtrei ka long kaba i shongshit bha, bad tang shiphang ki la lah ban pyndep ïa ka phang kaba heh kynian bad ka lynter kaba jrong. Utei u rangbah u batai, ba ka jingthmu ban pynim biang ïa kane ka jingtrei mon sngewbha ka long ban wanrah ïa ka jinglong kawei, ka jingieit, jingsngewthuh jingmut, ban ïa kitlang ïa ka khia ka shon ha ka shnong ka thaw bad ha ka Raid ka Hima; lada lah ban leh kylliang kylliang, ïa kaba ki khot ka ‘trei bara’ ne ka ‘Chunong’ ha ka ktien Pnar.
Nangta, kiba ha ïing hasem pat ki bunkam ban pynkhreh ïa ka sha ka dud bad ka jasngi ïa ki nongtrei; don ruh kiba shet ja, shet doh ha ki tyndongsiej ha ka rukom tynrai kaba itynnad bad ba bang bha ban bam. Ïa kane ka rukom rep, la ju leh ruh da ka Balang Presbyterian Nongrim Jirang, Ri Bhoi West Umtangar, Nongwah Mawtamur, Nongkseh Ri Bhoi, War Mawsaw & Pahambir. Katba ha Nagaland pat, ha ka shnong Thenyizumi ki dangleh ïa kane ka juh ka rukom puh pynthorkba , da kaba rwai (Hu..hoa..ha..)3 katba dang puh mohkhiew tangba shim bynta tang ki shynrang, katba ki kynthei pat ki shet ki tiew. Ynda la kylli ïa uwei u rangbah, balei ki trei bormet kumne haba la dei ka juk jong ki kor ki bor (machine age) : u jubab ‘ka machine kam lah ban bujli ïa ka jingtehsong jong u briew, bad kam lah ban ai jingkmen ïa ki paidbah. U ong, ki ïasam ïa ka jingïarkhie pashait, ki biria ban pynjah thait, ka jinglong kawei, ka jingburom kylliang bad khamtam eh ka jingpynneh ïa ka deiriti lajong’. Ïa kane ka programme ki shait leh bha da ki dkhot jong ka Baptist Thenyizumi Church ha Zarhoza valley kum ka community outreach programme ban pynmih fund ïa ka Mission jong ki.
U Bah Phras Syngkli, u don jingkyrmen ba kane ka rukom trei paidbah, kan im bad kyrsiew thiah biang ïa ki nongshongshnong ban ïalong kawei, namar dei hangne ba ki ioh ban ïa biria, ban rakhie, ban kmen, ban pynjah thait ïa ki jingkit bakhia jong ka jingim, ban ïasam lem ïa ki jingtip sha ki longdien. Ha shwa ïa kane ka programme jingiatreilang, la pynlong jingduwai da u Bah Isaiah Makri. Kiwei pat ki rangbah ba ïa donlang ki long u Rangbah shnong ka Umkaduh, Bah Mebanlamphang Lyngdoh nonghikai ha ka skulbah Martin Luther Christian University ryngkat bad ki Longsan jong ka Raid Mawsohbar.
Khatduh eh, ha ka juk jong ka jingwan tyllep ba kynsan jong ki umsaw, kano kano ka jaidbynriew kam lah ban im lymda ka pynkhlaiñ ïa kum kine ki deiriti u barim bajah. Kata ka social bonding ne ka jingïarap lang ban tehsong ïa ki parashnong parathaw ka la nang synjor wat hapdeng ki kmie ki kpa bad ki khun ki ksiew kumba don kawei ka video clippings, ba ki khun ki ksiew ki wankai sha ïing ka meiieid hynrei ynda la poi ha kamrapdeng, ym don khana uwei ruh, namar baroh baroh ki ïalehkai (brouse) ïa ki mobile phone lajong, katba ka meiieid bapli, ka anglyngngoh bad sah marwei hapdeng jong ki, ym don ba patiaw. Kumta, ki shnong ki thaw, ki Raid ki Hima bad ki Elaka ki donkam ban pynshlur ïa ka ‘trei yonglang’ ne community works, ban im ban khlaiñ biang ka Ri & ka jaidbynriew. La synran lang da u bah Banroi Syiem, Cameraman & Bah Tanbor Nongkhlaw.
Phi lah ban pathai khubor bad u nongthoh lyngba ka email : htwells@rediffmail.com