Kynnoh u Leslee ba u MLA ka Mahendraganj u la buh bad pynïaid be-aiñ ïa ka dukan kyiad

Shillong, Jylliew 01: U MLA barim u John Leslee K Sangma u la ujor ha u Superintendent of Police ka West Garo Hills da kaba kam ba u MLA ka Mahendraganj MLA u Sanjay A Sangma bad ka khun jong u ki la buh ïa ka wine store ha Tura hapoh ka kyrteng jong uwei pat u riew shimet, kumta u la kam ba kane ka la pynkheiñ ïa ka aiñ.
Katei ka wine store kaba la buh ha ka jingkylli la kynnoh ba la ïoh ha ka kyrteng jong Ruparam A Sangma, ba la khlad ha u bnai Risaw, 2025. Ïa ka jingai jingbit la leit ban pan da ka kurim jong u ka Silse Marak, ban bteng ban pynïaid ïa katei ka kyrteng bad la pynkynriah noh ïa ka licence ha ka kyrteng jong ka. Na ka liang ki pulit ki la mynjur bad pynskhem ïa kane ka jingkyrpad ha u Naiwieng 2025.
Nangta ha u Lber, katei ka dukan bad kawei pat ki la shah lute ha ki nongpynmih huri hura ha ka por ba mih ïa jingïakynad jaitbynriew halor ka jingïoh vote ki bar jylla ha ka Garo Hills Autonomous District Council (GHADC).
Ïa ka FIR la ujor da Dolse G Momin, ba dei ka khun jong u Sanjay Sangma, da kaba kam ba kumba T. 70-80 lak ka kiad la shah tuh.
U John Leslee u la kynnoh ba u Sanjay bad ka Dolse ki la long trai ïa ka building kaba don ka wine store bad kitei ki arngut ruh ki la pyntreikam bad ki la lah ruh ban ïoh ki lad jingmyntoi na ka wine store. U la kynnoh ruh ba ki la pynïaid ïa katei ka dukan kiad kaba pyni shai ba ki la pynkheiñ da kaba shai ïa ka Excise Act, bad bynrap ba ka jingbuh ïa ka dukan kiad ka la pynkheiñ ïa ka aiñ kaba dei ban don la kumno kumno 50m na ka surokbah (highway).