Nongpoh, Jylliew 01: Shillong, Jylliew: Ka Dr. Nibedita Paul, NSS Programme Coordinator jong ka skulbah USTM, ka la ïoh pdiang ïa ka khusnam ba kyrpang ha ka kyrdan National hapoh ka National Service Scheme (NSS) ha ka jingïalang Chintan Shivir ba la pynlong da ka Ministry of Youth Affairs & Sports ha Indian Institute of Management (IIM), Shillong.
Ïa kane ka khusnam la sam da u Myntri ka Sorkar Pdeng uba peit ïa ka Youth Affairs & Sports, u Dr. Mansukh Mandaviya, ha ka jingïadonlang ki heh ophisar bad ki riewpawkhmat na kylleng ka ri.
La ithuh ïa ka Dr. Nibedita Paul namar ki synniang ba khraw jong ka ha ka liang ka jingkyrshan ïa ki samla, ka jingïasnohkti bad ka imlang sahlang bad ka jingpynneh pynsah ïa ki nongrim jong ka National Service Scheme. Ka jingtrei shitom jong ka ban pynshlur ïa ki samla pule ha ki jingïarap paidbah, ka jingshakri mon sngewbha bad ki prokram tei ri ka la wanrah nam bad burom ïa ka USTM.
Ha kane ka Chintan Shivir kaba la neh ar sngi naka liang ki ophisar bad ki nongmihkhmat na ka Department of Youth Affairs, MY Bharat bad National Service Scheme (NSS) na kylleng ka India kila ioh ban ïakren bad ïathir sani halor ki lad ban pynkhlaiñ ïa ka jingïashim bynta jong ki samla, ka jingïatreilang hapdeng ki shnat treikam bad ban pynsted ïa ka thong jong ka Viksit Bharat 2047.
Ki nongmihkhmat jong ka Ministry of Youth Affairs & Sports ki la ai jingïaroh ïa ka bynta kaba kongsan jong ki NSS Coordinators ha ka ban tei ïa ki samla kiba don ka jingkitkhlieh ha ka imlang sahlang. Ki la pynpaw ruh ïa ka jingsngewnguh halor ka jingaiti lut jong ka Dr. Nibedita Paul ha ka ban ai ka jingshakri.
Na ka liang ka USTM bad ka jingïalang jong ka skulbah baroh kawei, la pynpaw ïa ka jingsarong bad jingkmen halor kane ka jingïoh khusnam, kaba la long ym tang ka burom ïa ka skulbah hynrei ïa ka jylla Meghalaya bad ka thaiñ Shatei Lam Mihngi hi baroh kawei.
