Ba shah pynbor ha ki kam awria, ïoh pyllait ka KSU ïa arngut ki samla Khasi na Delhi

Shillong, Jylliew 01 : Ka Khasi Students’ Union (KSU), Delhi Unit kala ioh ban pynlait ïa arngut ki kynthei na ri-lum Jaintia, kiba shah pynbor ban ïaid kam awria ha Delhi hadien ka jingshah pynngop ban aikam ïa ki ha kawei ka hotel.
Kat kum ka kyrwoh na ka KSU-Delhi Unit la ïathuh ba kane ka jingjia kala jia ha ka 31 tarik Jymmang hadien ba ka Seng kala ioh pdiang ïa ka jingkyrpad ban ïarap kyrkieh na kine kine ki samla kynthei, kiba la shah set kut ha ka briew kaba wan ialam ïaki sha Delhi.
Ka KSU mar mar kala pyntip ïa kane ka jingjia sha ki Pulit ka Delhi bad pan jingiarap ban ioh pynlait ïa kine ki thei samla.
Ka KSU ka iathuh ba ïa kine ki arngut ki thei samla la wan ialam ïa ki sha Delhi da kawei ka briew kaba kular ban pynioh kam ha kawei ka Hotel.Hynrei hadien ba poi ha Delhi, la kynnoh ba kila shah pynbor ban rung ha ki kam khaïi met.
Ka iathuh ba haba kine ki thei samla kila kyntait ïa kane ka kam, la kynnoh ba kane ka briew kaba wan ialam sha Delhi kala dawa ban siew biang ïa ka pisa ba ka pynlut ha ka leit ka wan jong ki bad kynnoh ba kala knieh ruh ïa ki mobile phone jong ki.La kynnoh ba kane ka briew kam shym la shah ïa ki ban mih na katei ka jaka tad haduh ban da siew ïa ka pisa ba ka pynlut na ka bynta jong ki.
Ka KSU ka pyntip ba ki Pulit ka Delhi kila shimkhia mar mar ïa kane ka kam bad kila lap bad ioh bat ïa kane ka briew na ka bynta ka jingtohkit.Ka iathuh ba ha ka jingtohkit, kane ka briew kala kyntait ïa baroh ki jingkynnoh bala mudui pyrshha ïa ka haba kam ruh ba kine ki arngut kila wan hi da ka monsngew bha lajong sha Delhi ban wadkam bad ba kala siew ïa ka bai leit bai wan jong ki ban ïarap ba kin iohkam.
La ïathuh ba kane ka briew kala kyntait ruh ba ka don bynta ha ka jingpynbor lane jingthmu ban pynryng ïa ki ha ka kam khaii met.
Hadien kane ka jingkem, ki Pulit kila bthah ïa kane ka briew ba kan pynphai noh ïa ki mobile phone bad ia kine ki samla la aiti noh ha ka jingiada bad jingiarap jong ka KSU Delhi Unit.
Na ka liang ka KSU kala pynbeit ruh ïa ki lad jingiarap ban lah pynpoi suk ïa ki sha la iing.La iathuh ba ki bahaïing jong kawei na kine ki samla, kala phah ïa ka pisa bai tiket liengsuin ba kan wan phai shala iing.
Ka KSU-Delhi Unit ka kyntu ïa baroh kiba wad kam ba kin long kiba husiar bha haba paidnag ia kino kino ki jingkular kam na ki briew bym lah ban shaniah bad ba kin pynshisha bha ïa ka jingshisha jong kine ki jingkular shuwa ban leit sha kiwei pat ki jaka.