Ngim dei ban leh khluit halor ka bhah thungkam, ka UDP ka don ha ka lynti ban shimkhia : Mayral Born

Nongpoh, Jymmang 26: Hadien ka jingtur jong ki paidbah ha ïing sah jong u MLA ka Nongpoh mynta ka sngi, u Bah Mayral Born Syiem u la pynpaw ba kum ki nongïalam kim dei ban leh khluit halor ka jingdawa ban pynthymmai ïaka Reservation Policy namar ïa kane ka kam donkam ban pyrkhat sani bad ban peit bad khmih bniah katkum ka lynti, namar kum u MLA un rah ïa katei ka mat sha ka miej jong ka party UDP kaba dang don haka lynti ban shimkhia ban ïakren ïa katei ka mat.
U Bah Mayralborn u la kyntu ïa ki paidbah nongshong shnong jong ka Nongpoh Constituency ba kin sngewbha ban ai ïaka jingïatreilang bad ba kin ïaishah bad na ka liang jong ka UDP kan sa shimkhia ïa kane ka kam na ka bynta ka jingmyntoi jong u paidbah bad kum u MLA u la pynpaw ka jingsngewkmen ban ïoh ïakynduh ïa ki paidbah bad khamtam ki khun samla jong ka Nongpoh kiba la wan ban ïakynduh ban pynsngew halor ka jingkwah ban pynkylla ïa ka Reservation Policy hapoh ka jylla.
U la pynpaw ruh ba kane ka dei ka mat kaba donkam kumba ki samla ha ka jylla naduh ki longkmie longkpa ki la khih ban mih shakhmat ban dawa na ka Sorkar ba ka dei ban pynthymmai bad pynkylla noh ïa ka Reservation Policy, hynrei katei ka dei ka mat kaba khia bad kaba jylliew bad pynpaw shai ruh ba ka UDP ka la don lypa ïa ka mat treikam ban ïakren bad phylliew jingmut kumno ban pyntreikam bha ïa ka Reservation Policy, hynrei kum ki nongïalam kam long ban shu leh khluit ha kane ka bynta.
“Ka UDP mynta ka dang don ha ka lynti ban peit ban khmih bad ban pynwan dur khnang ba kan long ka jingmyntoi na ka bynta ka ri Khasi bad Jaiñtia bad ka jylla hi baroh kawei khnang ba kan ym ktah ïano ïano namar kum ki nongïalam ba ki paidbah ki la jied ngi kwah ban wanrah ïa ka shongsuk shongshngaiñ hapoh ka jylla baroh kawei” la bynrap u Bah Syiem.