Tur ki paidbah sha ïing ki MLA ban dawa ban kren ïa ka Reservation Policy

0

Shillong, Jymmang, 26: Ki paidbah kiba la ïoh mynsiem na ka jingshah jingit ba khlem pud sngi jong u President ka Voice of the Poeple Party (VPP) u Bah Ardent Miller Basaïawmoit ban dawa ïa ka Sorkar ba ka dei ban khot da ka Dorbar Kyrpang ban ïathir ïatai halor ka State Reservation Policy, ha ka sngi Thohdieng ki la leit tur sha ki ingsah jong ki MLA ka UDP bad NPP ha kylleng ki Constituency ka rilum Khasi.
Ha Nongpoh Constituency, ki dkhot ka VPP ki la tur sha ïing sah jong u MLA ka Nongpoh u Bah Mayral Born Syiem ryngkat ki plakad ban dawa ba u dei ban kren eiei halor ka jingdawa ban pynthymmai ïa ka State Reservation Policy namarba ki MLA na rilum Khasi bad Jaiñtia ki dang sngap jar halor kane mat jingdawa.
U Bah Mayral Born da ka mynsiem ba kylluid, u la pdiang sngewbha ïa ki riewpaidbah ban ïasyllok ha ïing jong u da kaba kyntu ruh ba kim dei ban rah da ki plakad, hynrei kum u MLA u pdiang sngewbha ïa ki paidbah bad ki lah ban ïakren markhmat lada ki don kano kano ka mat kaba ki kwah ban kren.
Ha ka jingïakren bad ki lad pathai khubor hadien ka jingïakynduh ïa u MLA, u samla Aristone Ryndongsngi bad u Bah Arnold Syngkli kum ki riewpaidbah ki la pynpaw ïa ka jingsngewhun hadien ba u Bah Mayral Born Syiem u la ai ïa ka jingkyrshan ïa ka jingmih jong ki ban dawa ïa ka hok na ka Sorkar ba la donkam ban pynthymmai noh ïa ka bhah thungkam thungjam ha ka jylla bad kum u MLA u la kular ruh hakhmat ki paidbah ban shimkhia ban rah ïa ka mat jingdawa sha ka party UDP bad sha ka Sorkar.
Kine ki ar ngut ki samla ki la pynpaw ba ka jingleit tur sha ïing jong u MLA kam dei na kano kano ka daw shimet ne ka daw politik, hynrei ka dei beit ka mat jong ka jaitbynriew Khasi ban dawa na ka Sorkar ba ka dei ban pynthymmai noh ïa ka Reservation Policy namarba ka bhah thungkam ha ka jylla ka la noh shilliang shaba shaba palat haba nujor hapdeng ki Khasi, Jaiñtia bad ki Garo.
Ki la kyntu ruh ïa baroh ki MLA Khasi ba ki dei ban kren eiei halor katei ka mat namar kane ka dei ka por kaba biang eh ban pynthymmai noh ïaka bhah thungkam bad kim dei ban shu sngap ne hun ïa ka jingshah ñion beiñ ki khun samla da kaba bynrap, “to tip ba ïa u sdie la pyn ap lypa ha trai u dieng, jar u dieng u bym sei soh yn khet bad thang noh ïa u ha ka ding.”
Da ki phew ngut ki riewpaidbah na Mawkynrew Constituency ha kane kajuh ka sngi ki la tur sha ïingsah jong u MLA ka Mawkynrew Constituency u Bah Banteidor Lyngdoh ha Shillong ban dawa ba u dei ban kren eiei kum u MLA Khasi halor ka jingdawa ban pynbeit thymmai ïa ka Reservation Policy.
Ïa kane ka kynhun ki riewpaidbah la ïalam da u Convenor jong ka Voice of the People Party ka Mawkynrew Constituency u Bah Seiborlang Warbah.
Namar ka jingbym ïakynduh ïa u MLA, u Bah Seiborlang Warbah u la shu ïoh ban ïakren lyngba ka Telephone da kaba kyntu ïa u Bah Banteidor Lyngdoh ba un kren lem halor ka jingdawa ban pynbeit thymmai ka Reservation Policy.
U dkhot jong ka VPP Mawkynrew Constituency u Bah Khrawpyrkhat Mynsong, ha ka jingïakren bad u nonglum khubor u la ong, “kane ka long ka jingkyrpad jong nga sha baroh ki MLA Khasi, mynta phi dang ïohi tang ki jingjaw jong ki ummat, wat pynbor ba phin ïohi ïa ka jingjaw jong ka snam.”
Ha West Shillong Constituency, ha kane kajuh ka sngi, katto katne ngut ki riew paidbah ki la tur sha ka ïing u Working President ka UDP Bah Paul Lyngdoh ha Mawprem uba ong ruh u Myntri Sorkar bad kynthoh tyngeh da ki jingthoh halor ka jingsngap jar ïa ka jingktah ka State Reservation Policy ïa ka jaidbynriew Khasi-Pnar.
Kane ka kynhun kaba don kumba 20 ngut eiei, kila ïarah lang bad la ki jong ki placard kiba don ïa ki jingthoh “Ngi jied ïa phi ban long u Khla ym u Shrieh”, “Ka lawei bad ka shuki rai ma phi mynta, ïa ka lawei jong phi ngin sa rai ma ngi”, “Ka Jaidbynriew ne ki Sbai”, “Jingshet Kylla”.
Ki la pynkymaw ruh ïa ki jinglong nongïalam u Bah Paul Lyngdoh ha ki snem ba la leit noh da ka jingthoh ha ka banner “Phi dei u nongïalam ka PRAC, mynta phi dung kylla ïa ngi bad pruk bad prak”.
Nalor kane ki la kynthoh ruh da ka jingthoh ha ki banner, “Phin roi ma phi, ngim don jingbishni, hynrei ym da ka lawei ka hok jong ngi.”
Ki la pynpaw ruh ïa ka hok ban dawa bishar thymmai ïa ka Reservation Policy da ka jingthoh “Ngi bun paid, Ngi bun Nongmihkhmat, bun ruh ki samla khlem kam, hato phi dang sngap jar?”
Katto katne ki riew paidbah ki la tur sha ki ingsah jong u MLA ka Mylliem Constituency u Bah Ronnie V. Lyngdoh ha ka wat kaba ar bad kumjuh ruh sha ingsah jong u MLA ka Mawsynram Constituency ha Umshing Umjapung Mawlai, Shillong, sha ingsah jong u MLA ka Ranikor Constituency ha Mawlai Kynton Massar, Shillong, sha ingsah jong u MLA ka Nongstoiñ u Bah Gabriel Wahlang, sha ingsah jong u MLA ka Amlarem u Bah Lahkmen Rymbui bad sha kiwei kiwei ki jaka.

Leave A Reply

Your email address will not be published.