Shillong, Jymmang 26: Ka United Democratic Party (UDP) ha ka sngi thohdieng ka la dawa na ka sorkar Meghalaya Democratic Alliance ba ka dei ban pyntreikam ïa ka Roster System shakhamt naduh ba a mynjur ym ban kyrtiang dien shaduh u 1972.
Haba kren sha ki lad pathai khubor hadien ba la wai ka jingïalang ki MLA bad ki nongïalam ka party, u Bah Metbah Lyngdoh u la ïathuh ba ha ka jingïalang ki la rai da kawei ka sur ban dawa ban sorkar ban pyntreikam sha khmat ïa ka Roster.
U Bah Metbah u la ong ba ka party ka sngew dei ba ka roster dei ban pyntreikam beit shakhamt naduh ba la mynjur namar kiba bun ki tnat sorkar kim don shuh satia ïa ki kot ki sla ha kaba ïadei bad ka jigpynthep kam naduh ki snem ba mynshuwa.
U la ong ba kumba ka sorkar ka la thung ïa ka komiti ba kyrpang na bynta ban batai ïa ki MLA bad ka party ha kaba ïadei bad ka Roster na ka liang ka UDP kan rah ïa ki mat ki jura kiba don ka jingjyrwit jyrwat ha kaba ïadei bad ka roster.
Haba ïadei bad ka jingdawa ban pynkylla ïa ka reservation policy, na ka liang u Bah Metbah u la ong ba kane ka mat ka party kan ïatai sani namar ka dei ka mat kaba ka party ruh ka la kular ha ka manifesto ka party.
“Kumba ngi kular ha ka manifesto kumta ruh ngin bud dien bha ïa kane ka mat ha ka lynti kaba dei bad ngin ïakren bad ka sorkar ha kaba ïadei bad ka jingpynkylla ïa ka reservation policy kaban wanrah jinghun ïabaroh,” u la ong.
Haba ïadei bad ka jingshah thngan u Bah Ardent ban dawa pynkylla ïa kane ka Reservation Policy u Bah Metbah u la ong, “U don u Myntri Rangbah bad ka kynhu myntri jong u kiba dei ban peit ïa kane ka mat bad nga ieh ha ka jingstad jong ki bad ngam kwah ruh ban kynthoh ïa ka jingdawa pynkylla da kino kino ki seng saiñ pyrthei,” u la bynrap.
