Shillong, Jymmang 26 : Ki pulit jongka jylla ki la lum nuksa na ki tiar na phyllaw ka skul Khasi Jaintia Presbyterian Girls Higher Secondary ban phah eksamin sha Forensic khnang ban tip la ka don ne em kano kano ka jingleh dusmon da ki runar ban thang ïa ka skul kaba la ïeng la 131 snem.
“ Ngi la lum nuksa na katei ka jaka ban phah sha ka forensic ban pynthikna ïoh ka don kano kano ka jinglehthok ne leh dusmon kat haduh ban kylla dpei katei ka skul” ong u SP (City) bah Vivek Syiem mynta ka sngi Thohdieng.
Ha ka 21 tarik mynstep por kumba 1.30-2 baje ei ei dang step phyrngap kane ka skul ba la seng ha u snem 1982 bad kaba la dap 131 snem ka la kem ding kynsan bad kylla dpei.
Ki jingkylli ki mih kumno kan jia kata ka jingkem ding na ka daw jongka bording eletrik haba kane ka jia ha ka por ba la sdang ka load shedding ne jingpynlip bor ding. Ka bording eletrik ka lip ha ka por 12 baje thik katba kane ka skul ka dang sdang ban kemding ha ka por kumba 1.30 ne 2 baje ei ei.
U bah Syiem u la ong “ Ki bor pynïaid ka skul ruh ki la ailad ïa ngi ban tohkit bniah ban tip la ka don ne em kano kano ka jingleh dusmon na shalyndet bad lada ngi lap ngin bud dien haduh ban da ïoh kem ïa kita kiba donkti”.
Halor ka jingkylli kaei ka jinglap ne jingsuba jongki, u SP u la ïathuh ba ka dang kloi than ban ïathuh. Ailad ban da dep eksamin ka Forensic bad hadien ba la ïoh ïa ka kaiphod na ka FSL yn sa tip bad kumjuh ruh na ka Fire Service yn sa tip kham bniah.
Ki jingkylli ki mih namar ka rukom kem ding jongka skul na ki briew kiba ïohi ruh ka kem ding buk ha kajuh ka por bad khmat bad dien kaba la pynlyngngoh ïaki briew haduh katta katta.
