Tuid kiba wan ai jingkyrshan, bun kiba jaw ummat tang shu ïohi ïa u Bah Ardent

Shillong, Jymmang 26: Ka jingïakhih shong shah thngan jong u Bah Ardent ha ka sngi Thohdieng ka la jam sha ka sngi kaba saw bad la ïohi ba kane ka jingïakhih jong u ka la ïoh ka jingkyrshan pura na ki paidbah kiba la wan na kylleng ki shnong jong ka Bri u Hynñiewtrep ban wan kitbok ïa u Bah Ardent.
Ha ka sngi Thohdieng la sakhi ba kiba bun bah ki la wan ban ai mynsiem ba kynthup naduh ki samla pule Reserch Scholar na NEHU bad kiba bun ki kolej bad ki jaka pule. La ïohi ruh ba kiba bun ki khynnah skul ki la wan ban ai khublei ïa u Bah Ardent ryngkat ka uniform school jong ki.
Ha kane ka sngi la ïohi ba ym tang ba kiba bun ki riew paidbah bad ki nongïalam seng bhalang bad kiba bun ki kynhun hynrei la ïohi ba kiba wan ban kyrshan ki kynthup ïa i kmie jong u, i kurim bad ki khun jong u.
Namar lehse ka jingbun than ki paidbah kiba kwah ban khublei ïa u Bah Ardent la ïohi ba ki nongïalam ka party ki la ker noh da ki siej ïa ka jaka ba u shong khnang ba ki paidbah kin ym ïoh tur shuh sha u hynrei u la shu ai khublei beit ïa ki paidbah da kaba rah kti na ka jaka shong ba la pynkhreh kyrpang.
Lah ban sakhi ba ki paidbah kiba bun hi ki la jaw ummat haba ïohi ïa u Bah Ardent ha ka por ba ki ai khublei.
Napdeng kiba bun ki kynhun kiba la poi ban ai jingkyrshan ki kynthup ïa ki khun ki hajar ka shnat Hima Nongwah-Mawtamur, ka nongdie madan ha Laitumkhrah, ki nongdie jhur na rilum Jaintia, ka Ka Sur U Paidbah Ka Bri U Hyñniewtrep, ka seng NHP, bad kiba bun bah ki seng bhalang bad ki riew shimet.