Ka jingkren u Education Minister ka long kumba ibeiñ ïa ki Samla: VPP

Dei kamram jong ka sorkar ban ïada ïa ka RP ha Ïingbishar

0

Shillong, Jymmang 26: Ka Voice of the People Party (VPP) ka la ther kylla ïa u Myntri ka tnad pule puthi, u Rakkam Sangma da kaba ong ba ka jingong jong u ba ka jingïakih ban dawa pynbha ïa ka Polisi bhah thungkam kadei tang ka Drama, kadei ka jingibeiñ ïa ki Samla.
Ha ka kyrwoh ba la phah da u Dr. Batskhem Myrboh, Nongaiktien ka Seng, ka VPP ka pynrem jur ïa kane ka jingkren u Myntri uba la ong ruh ba kane ka jingshah thngan u Bah Ardent Basaïawmoit kadei tang ka drama saiñpyrthei. “U Myntri bad ka kynhun Myntri hi baroh kawei kidei ban shim ïa ka jingkitkhlieh kiba la long ka daw bah ha kaba ïa ki kam ba donkam jong ka jaidbynriew la hap ban rah sha surok”, la ong ka Seng da kaba ong ruh ba ka sorkar kadei ba shim ïa ka jingkitkhlieh haba ka la buh ïa ka jingim u Bah Ardent ha ka jingma.
U Dr. Myrboh, u la ong ba jin da lada ka sorkar ka shimkhia ban pynbeit ïa kane ka kam kaba long ka jingdawa ki paidbah ban pynbha ïa ka Polisi bhah thungkam kane ka kam kan nym poi sha kane ka jinglong kumba long mynta.
U Nongaiktien ka VPP, u la ong ruh ba ka Polisi ka kren shai ba ka jingbhah kam kadei ban long katkum ka jingbun briew. Ka kyndon kaba 8 jong ka Resolution ba la pynmih ha ka 12.01.1972 ka kren shai halor ka jingbhah kam katkum ka jingbun briew. “Ka VPP ka kyntu ïa u Myntri ba un da pule sani ïa ka Policy haduh ba un da sngewthuh ha shuwa ban kren ei ei halor kane”, la ong ka Kyrwoh.
Halor ka jingong jong u ba ka VPP ka ïalehkai bad ka lawei ki Samla bad kane ka jingïakhih ka long kum ka ding kaba lah ban thang duh ïa ka jylla, da kaba kren halor ka rai jong ka Supreme Court, u Dr. Batskhem u la ong ka ri India kaba laitluid kam treikam tang ha ki jingsawa ne ha ka jingbym don jong ka, hynrei ka treikam katkum ki aiñ bad ki jingshisha kiba don hakhmat jong ka. “Kadei ka kamram jong ka sorkar MDA:2 ban ïada ïa ka Reservation Policy hakhmat ka ïingbishar bad lada kam lah , kadei ban shim ïa ka jingkitkhlieh”, la ong ka Seng.

Leave A Reply

Your email address will not be published.