Ai jingmut u bah Titos ban ïakynduh ka KHADC bad KAAC ban ïa pynbeit ïa u pud u sam

Shillong, Jymmang 26 : U Chief Executive Member jongka Khasi Hills Autonomous District Council (KHADC) u bah Titosstarwell Chyne u la ai jingmut ïa ka jingdonkam ban ïa kynduh kyrpang hapdeng ka KHADC bad ka Karbi Anlong Autonomous Council (KAAC) ban ïakren halor ka kam ïakajia pud bad kumno ban ïa pynbeit ïa kane da ka jingïasngewthuh jingmut lang.
Ha ka shithi ba u la thoh sha u CEM ka KAAC u Tuliram Ronghang u bah Titos u la ong “ Ha kaba ïadei bad kane ka kam nga kwah ban ai jngmut ban don noh da ka jingïalang ba kyrpang hapdeng ka KHADC bad KAAC ban ïakren sani bha halor u pud u sam bad ïa kaei kaba mih na ka jingïalang yn sa phah jingtip sha ka sorkar Meghalaya bad sorkar Assam ba kin leh ïa kaba donkam”. U la ong shuh shuh ba ïa kane ka kam ïa kajia pud hapdeng ka Meghalaya bad Assam ym pat lah ban ïa pynbeit satia haduh mynta bad kine ki jaka ki kynthup ïa ki jaka ba hap hapoh u pud u sam ka KHADC marjan bad ki jaka ka KAAC kiba dei ha Block II.
U la ong ba kane ka jingbym lah ban pynbeit ïa u pud u sam ka la wanrah ia shibun ki jingeh ïa ki briew kiba sah ha khappud naduh mynshwa haduh mynta bad i kumba ka la nang sniew katba nang mih ki sngi.
“ Kumta ïa kane ka kam ba sahteng la slem bah ka donkam ïa ngi ban shim khia bad pynbeit noh shisyndon kloi katba lah khnang ba ka shongsuk shongshngaiñ, ka roi ka par, ka bha ka miat kan wanphai biang ha kine ki bynta khappud ha ki por ban sa wan” ong u bah Titos.
U la kyntu ruh ïa ka jingdonkam ban pynneh pynsah ïa ka shongsuk shongsaiñ bad ka jingïasngewthuh jingmut lang. “ Ha kajuh ka por nga sngew donkam ban pynneh ïa ka shongsuk shongsaiñ bad kiar na kaba pyndik ïa ki paid nongshong shnong ha khappud khamtam ïa ki jaidbynriew Khasi Pnar kum ka dak ka jingïaburom para briew bad khamtam ïa ki hok tynrai longbriew man briew kumba la ohshrong ha ka Riti Synshar jongka ri India” Pynkut u bah Titos.