“Ngin sa thoh sha u DTO ban pyndam ïa ki Permit jong ki kali bym don Trading License: CEM KHADC

Shillong, Jymmang, 26: U Chief Executive Member (CEM) jong ka Khasi Hills Autonomous District Council (KHADC) u Bah Titostarwell Chyne u la ïathuh ba ka Executive Committee jong ka Council kan sa phah da ka jingthoh sha ka ophis u District Transports Officer (DTO) jong ka East Khasi Hills District ban phah pyndam lut ïa ki Driving License jong ki nongñiah kali bar jylla kiba buh kali kamai bad ïa kiba ñiah kali kamai khlem da ïoh ïa ka Trading License bad ïa ka Labour License na ka District Council.
Ka District Council ka la phah khynra naphang ha ki Pulit ka tnat Enforcement ïa ki nongñiah kali kamai bar jylla ha ki hynñiew tylli ki Zone hadien ka jingdawa jong ka East Khasi Hills Local Taxi Welfare Association na ka jingshah shoh pynmynaw jong ki arngut ki nongñiah kali kamai dang shen ha Khyndai Lad, Shillong ha ki san ngut ki bar jylla kiba la shah kem mynta ha ki Pulit ka Shillong Sadar Police Station.
Ha ka jingïakren bad ki lad pathai khubor ha ka sngi Thohdieng, u CEM ka KHADC u la ïathuh, haduh mynta ka tnat Enforcement ka dang ai kaiphod tang na ki lai tylli ki Zone halor ka jingdon jong ki nongñiah kali bar jylla ki bym don ïa ka Labour Licence bad ïa ki kali kamai jong ki bar jylla ki bym don ïa ka Trading License.
“Ki don hynñiew tylli ki Zone, hynrei haduh mynta ngi dang ïoh jingkheiñ ba malu mala tang na ki 3 tylli ki Zone,” ong u Bah Chyne.
“Hadien ba nga la peit ïa ka kaiphod, nga la ba bun ki kali kiba ïaid khlem ka Trading License bad kumjuh ruh ki nongñiah kali kiba ñiah ïa ki kali jong ki trai jylla lane jong ki bar jylla ngi lap ba ki don ki briew jong ngi kiba ai ñiah kali ha ki bar jylla,” u la ong.
“Ha ka Lah Sngi u Blei jong ka taiew ban wan, ngan sa lum jingkheiñ katno tylli ki local taxi kiba ïaid khlem ka Trading License, katno ngut ki nongñiah kali bar jylla kiba ñiah kali khlem ka Labour License bad ïa baroh ki kali ba la ïoh registration number bym don ïa ka Trading License ngin sa thoh beit sha ka ophis DTO ban leh eiei. Kam lah ban long ban shu ïaid khlem ka laisen bad ngin sa shimkhia bha ïa kane ka kam ba baroh ki la ïoh Permit bad shu ïaid khlem ka laisen ngin phah pyndam mardor ïa ka Permit,” la ong.
Ha kaba ïadei bad ki nongñiah kali bar jylla, u CEM u la ong, “hadien ba la sdang ka jingkhynra naduh hynin ka sngi Palei, kiba bun (ki nongñiah kali bar jylla) ki la wan mih sha Ophis. Nga la ai da ka jingbthah ïa ki nongtrei ba kim bit ban ai ïa kano kano ka Labour Certificate na ka Council katba ngim pat ai ïa ka hukum. Mynta ka sngi ngi la khang noh ïa ka ophis jong ka tnat Labour bad ngin sa shong pyrkhat biang ïa kane ka kam ha ka Lah sngi U Blei jong ka taiew ban wan,” u la ong.
U CEM u la ong ba kito ki nongaikam ki dei ban da pyndap da ka Form bad ban shim ruh ïa ka jingkitkhlieh (Undertaking) ïa ki nongñiah kali. “Mynta nga la ai hukum ba dei ban shim ïa ka Residential Certificate jong ki nongñiah kali bar jylla khnang ban pynshisha ki wan nangno bad hangto ki shong ki sah kum ka jingpynshisha,” u la bynrap.
Katkum ka jingïathuh jong u Bah Chyne, haduh mynta ka tnat Enforcement ka dang ai jingkheiñ tang na ka thain Red Cross, Laitumkhrah, Dhankheti, Malki, Barik Point, Polo, Golflink bad Nongmensong.