Wan jngoh u Bah Hek ïa u Bah Ardent ha jaka shah thngan, khlem treh jubab la u kyrshan ne em ïa ka jingdawa

Shillong, Jymmang 26: U Myntri jong ka sorkar jylla, u Bah AL Hek ha ka sngi Thohdieng u la leit ban ïakynduh bad u Bah Ardent ha jaka ba u pynlong ïa ka jingshah thngan tangba haba ki lad pathai khubior ki pyrshang ban ïakren u Bah AL Hek um treh satia ban jubab shai la u kyrshan ne em ïa ka jingdawa ka VPP.
“Ngi ïadei paralok naduh mynba ngi dang dei u dkhot FKJGP, bad haduh kat mynta kane ka jingïadei ka bteng na kata ka daw kum u paralok nga wan ban kitbok ïa u ha kane ka jingïakhun ba u shim ba un koit un khlaiñ,” ong u Bah Hek haba kren bad ki lad pathai khubor.
Haba kylli u kyrshan ne em ïa kane ka jingdawa pynbeit biang ïa ka Reservation Policy u Bah AL Hek ula jubab, “Haba don kino kino ki jingdawa kiba bha bad ban kyntiew ïa ka jylla nga kyrshan beit bad ka sorkar ruh ka dei ban pynsngap ïa kata ka jingdawa.”
Haba pyrshang ban kylli la u ïohi kane ka jingdawa u Bah Ardent u ïohi ne em ka dei kaba bha hynrei na ka liang u Bah Hek um shym la jubab satia ïakane bad kiew kynsan noh ha kali.