Nongstoiñ, Nailur 23: Watla ka jylla Assam bad Meghalaya ka dang pynsahteng ha ka ban pynbeit ïa u pud u sam ha ki hynriew tylli ki jaka ïakajia. Hynrei hadien ba ka sorkar MDA kaba la ïalam da ka NPP ka la ïoh ban synshar biang, ki paitbah ba shong ba sah ha ki shnong khappud ki la khmih lynti bad kyrmen ba ha kane ka sien kaba ar jong ka jingïapynbeit ka sorkar, kan shim ban pynbeit katkum ka mon jong ki paitbah nongshong shnong.
Ha kaba ïadei bad ka jingpynbeit ïa u pud u sam bad ki shnong ki thaw bad ki jaka puta jaka puta kiba hap ha Langpih sector, u bah Wondar Lyngkhoi sordar jong ka shnong Umyiap u la pynpaw ba na ka liang jong u, u la ju lum ïa ki jingïalang paitbah naduh ki rangbah, ki longkmie, ki samla haduh khynnah, ban pynshai ba lada ka sorkar Meghalaya kan khynñiat jubor sha Assam, ki paitbah jong katei ka shnong bad baroh ki shnong Khasi kiba hap ha ka Langpih sector, kin ym shah satia bad lada ka leh jubor kim banse ban pynlong da ki jingïakhih kiba tyngeh.
U bah Lyngkhoi u la pynpaw ruh ba ki paitbah shnong kim don jingsheptieng ei ei, namar ka dorbar shnong ka la pynbit pynbiang ïa ki dulir bad ki kot ki sla ban pynshisha ba katei ka shnong bad baroh ki shnong Khasi ha ka thaiñ ki hap hapoh Meghalaya.
U la ong ruh ba katkum ki dulir ba ka dorbar shnong ka la submit sha ka sorkar, la kdew shai ba ka shnong Umyiap ka la don naduh u snem 1970 mynba ym pat ïoh ïa ka jylla ba pura. Nangta ha u snem 1972, u Syiem ka hima Rambrai u la pynskhem ïa katei ka shnong da kaba ai sanad ïa u sordar bad registar ruh ïa u pud shnong.
Hadien kata ha u snem 1990 ka District Council ka la pynrung ïa katei ka shnong ha ka land record bad ha u snem 2009, ka shnong ka la ïoh ruh ïa ka jingithuh na ka revenue department jong ka ophis u Deputy Commissioner ka West Khasi Hills. Kumta, lada ka sorkar Meghalaya ka khynñiat jubor sha Assam ki paitbah kin ym aili satia kat kum ki dulir ba la dep submit sha ka sorkar.
U bah Lynkhoi u la ong ruh ba baroh ki shnong Khasi ba kynthup naduh Nongmawleiñ, Ïewnongma, Mawlan, Langpih Umtap, Madanjaïaw, Langpih, Umwali, Mawdiangsnam, Domtiewaw, Umwahsiang, Mawsikar, Umyiap, Umbyrsit Umpha, Nongma, Nongmawlong bad kiwei kiwei ki shnong, ki la pynkhreh ïa ki jingthoh jingtar kiba biang ban aiti ha ki nongïalam jong ka Regional Committee on Border Dispute ynda ki la wan ban jurip ïa katei ka thaiñ.
U bah Slikshon Hoojon sordar barim jong ka shnong, u la ong pat ba u la dep pan jingshai na ki paitbah la ki kwah ban sah ha Meghalaya ne ki kwah ban leit sha Assam, ha kaba baroh ki paitbah naduh ki rangbah, ki longkmie, ki samla haduh ki khynnah ki la pynsawa tang kawei ka sur bad kaba ong ba ki kwah ban don beit ha Meghalaya.
Lada ka sorkar kan khynñiat sha Assam ka long kumba ka leh beiñ ïa ki, namar kim sngewthuh satia ban ïakren ïa khana, nangta ka riti ka dustur, ka niam ka rukom ruh kam ïadei satia.
Nalor kata ki paitbah da kawei ka sur ki la dawa na ka sorkar ba ka dei ban sngap ïa ka sur jong ki paitbah, namar lada kam sngap ka lah ban mih ka huri hura kaba kham jur ban ïa kaba long mynshuwa.
