Nongstoiñ, Jylliew 09: Ka Nongrangoi (Umyiap) sub health centre ka dei kawei na ki jaka sumar kiba la rim bha ha katei ka thaiñ bad kaba la ai jingshkari ïa ki paidbah la palat arphew snem hynrei ki dang don shibun ki jingduna kiba na ka liang ka sorkar lyngba ka tnad ka koit ka khiah ka dang donkam ban pynbit pynbiang.
Ki bynta ba kham kongsan kiba dang donkam ban pynbiang ha katei ka jaka sumar ka dei ka jingker kynroh baroh sawdong ïa katei ka jaka sumar namar ba ka don ha pdeng jong ka steshon shnong kaba dei ruh ka jaka ba ki don ki bun phew tylli ki dukan jong ki nongshong shnong. Nalor kata ka don ruh ka surok kaba ki briew na kylleng ki jaka ki ïaid lyngba ha ka por mynsngi bad mynmiet ruh kumjuh.
Ha kaba ïadei bad ka jingshngaiñ bad ka jingbit jingbiang jong katei jaka sumar u Bah J.L.Nonglait sordar jong ka shnong Nongrangoi haba ïakren bad u nongthoh khubor u la ong ba ka jingker da ka kynroh baroh sawdong ïa katei ka jaka sumar ka long kaba donkam eh namar bun ki khynnah ha ka por mynsngi ki leit ban ïalehkai ha baranda.
Nalor kata teng teng ki jingri jingdup ruh ki ïoh lad ban rung ha phyllaw bad ha ka por ba ki nongtrei ki hap ban sahmiet ruh kam long kaba shngaiñ lada ym don ka kynroh kaba biang baroh sawdong.
Ha kaba ïadei bad ka jingdon jong katei ka jaka sumar u bah Nonglait u la ong ba ka la long ka jingmyntoi kaba khraw ïa ki paidbah jong ka thaiñ bad ki nongtrei ha katei ka jaka sumar naduh ba la plie haduh mynta ki la ai ka jingshakri kaba bha tam ïa ki paidbah ha kaba ïadei bad ka jingkoit jingkhiah khamtam ïa ki longkmie kiba armet kiba ju wan ban phah chek up ha ki nurse kiba trei ha katei ka jaka sumar.
Ha kajuh ka por u la kyntu ruh ïa ki paidbah nongshong shnong ba kin ai ka jingïatreilang bad ki nongtrei ha katei ka jaka sumar khamtam ha kaba ïadei bad ka jingpynneh ïa ka khiud ka suba bad ka koit ka khiah.
