Shillong, Jylliew 09: Ka ophis SDO Pynursla Civil Sub Division ka la pynbna ïa ki nongleit nongwan ha shilynter ka surok Laitlyngkot-Lyngkyrdem ba kin ïai shah naba ïa kane ka surok la hap ban khang ïaid lynti biang na kane ka thaiñ kaba man ka sngi bad kane kan treikam naduh ka 11 tarik Jylliew namar ba ka Sorkar kan pynsdang ïa ki jingtei ba hap pyndonkam ïa ki mashin kiba heh ha ki bynta ka Chainage Kms 24+00 to 34+00.
Lah ban ong ba ka jingpynbna u Sub-Divisional Officer, Pynursla Civil Sub Division, ka ïathuh ba ïa kane ka jingkhang ban ïaid lynti ka dei kaba la leh na ka bynta ka jingbit jingbiang jong ki paidbah, ban ïada na ki jingjia aksiden bad ban ïaid beit ïaid ryntih ki jingpyntrei ïa kane ka surok. Kane ka hukum ka dei ka jingbteng ïa ka hukum kaba la pynmih ha ka 21 tarik Jymmang, 2026.
La ong ba kane ka surok kan dang khang man ka sngi naduh ka por 10:00 mynstep haduh 4:00 janmiet bad 10:00 mynmiet haduh 5:00 mynstep.
Shuh shuh ki bor pynïaid ki la ïathuh ba baroh ki kali yn shah ban ïaid na baroh arliang, Laitlyngkot bad Lyngkyrdem tad haduh ka por 10:00 baje mynstep bad hadien 10:30 mynstep yn khang biang ban ailad ïa ka company ba kin sdang biang ki kam shna surok sha kane ka thaiñ.
Ka jingpynbeit kan long kaba shipor bad man ka sngi, bad kan dang treikam haduh ban da pynmih da kawei ka jingpynbna.
La ong shuh shuh ba namar ka jingsdang jong ka aïom lyiur, ka bor district ka la ai jingmut ïa ki nongleit nongwan ba kin long kiba husiar bha haba ki ïaid lyngba katei ka jaka. La kyrpad ïa ki paidbah ban kiar na ki jingleit jingwan ki bym donkam ha ka por ne marsien dep slap bad ha ki por miet.
Ki kali ba donkam eh, kum ki kali kit nongpang, ki kali pynlip ding, bad ki pulit yn shah ban ïaid ha ki por ba khang, katkum ka jingpeit bniah ïa ka jingshngaiñ da ki bor pynïaid ha ka jaka.
La shah ïa ki kali kit nongpang, Fire Service bad ki pulit ba kin ïaid ha kitei ki por ba donkam kyrkieh bad ki lah ban phone ha u number 9862251116 jong ki Pulit ka Pynursla Police Station na ka bynta ban ïa pynbeit ha ka leit ka wan sha katei ka thaiñ, ïathuh u Bah G Warjri, MCS, Additional Deputy Commissioner incharge Pynursla Civil Sub Division.
