Donkam ban kynthup ïa ka AI ha ki skul hapoh ka jylla ong u Myntri

Shillong, Jylliew 9 : Ka Meghalaya kam lah ban shu sah shadien ha ka juk jong ka Artificial Intelligence (AI) bad ka hap ban pynbeit ïa ka rukom ai jinghikai da kaba kynthup ïa ka AI ha baroh ki skul, ong u Myntri ka Pule Puthi u Ma Lahkmen Rymbui ha ka sngi Baar haba pynpaw ïa ka jingduna ki nonghikai kiba la pyntbit kaba long kum u mawjynthud ban pynïaid shakhmat ïa ka jingpule jong ka AI.
U Ma Rymbui ula ong, ba ka jylla ka dang peit ban wanrah ïa ka jingkylla hynrei ka jingïaid shakhmat kan shong pat ha ka jingïatreilang bad ki kynhun kiba la dep pyntbit halor ki kor teknoloji.
“Peit ngi hap ban ïa beh bad ym tang ban shu tip hynrei ngi hap ban ïaid bad kane ka juk kaba mynta ne ka rukom kaba thymmai ha ka jingai jinghikai.
Dei halor kane ba ngi dang pyrshang ban wanrah ïa ka jingkylla, ka jingkylla ha kata ka rukom ïa kaba donkam ban leh. Hynrei haba nga ong kumtei, ka long kaba suk ban shu kren ban ïa kaba leh namar ba ngi donkam ban ïatreilang bad kino kino ki paralok kiba tbit ha ki kor ki bor teknoloji. Mynta lada phi ong ba ka AI ban pynïar ha baroh ki skul kumta ka jingkylli kaba mih ka long mano ban hikai ïa katei ka sobjek lada ngi kynthup ïa ka ha ka Curriculum? Ngi hap ban pyndonkam ïa ki teknoloji” la ong u Myntri.
Ula pynpaw ïa ka jingkongsan ban pyndonkam ïa ki kor teknoloji ka dei ka lynti, watla ki tiar ki lah ban long ki ban treikam tang shipor ne Outdated.
“Ngim lah ban thung ïa ki nonghikai AI ne AI Professor, hynrei ngi hap ban pyndonkam ïa ki teknoloji katba don ïa ki kor teknoloji, ki lah ban long ki bym treikam shuh ha ki 10-15 snem. Hynrei ngi hap ban ïaid shakhmat” la ong u Bah Rymbui.
U Myntri ula bynrap ba ka sorkar pdeng ka dang ïaleh ban pynbor ban pynïar ïa ka jingpule ha ki teknoloji kiba thymmai bad ka lynti ïaid jong ka Meghalaya kan long kaba shai kdar ha ki por kiban wan.
“Ym tang ka sorkar Meghalaya, wat ka sorkar India kala ithuh ïa ka jingdonkam ban pule ïa ki teknoloji kiba thymmai. Kumta baroh ki la don ha ka miej hynrei ngi hap ban ban ïaid shakhmat. Kumno ngin ïaid shakhmat ngin sa tip ha ki por ban wan” ula bynrap.