Shillong, Nailur 23 : Ka jingpynkylla biang ïa ka KHAD Administration of Elaka (second amendment) Bill ka long da ka thong ban pynkhlaiñ shuh shuh ïa ki shnong khnang ba ka jingtreikam ban tehlakam ïa ki briew kiba nabar kiba wan sah ha u pud u sam jong ka Council kan long kaba pyrkhing, ong u CEM ka KHADC, Bah Pynïaid Sing Syiem.
U CEM haba kren bad ki lad pathai khubor hadien ba la wai ka Dorbar Kyrpang jong ka Council ha ka sngi Thohdieng u la ong ba da ka jingpynbeit biang ïa katei ka Bill ha ka sien kaba ar ka long ba khnang ba ka jingtreikam jong ka, kan syriem thik kum ka Inner Line Permit namar ki dorbar shnong ki ïoh ïa ka bor.
“Ha kane ka jingpynbeit thymmai la ithuh kyrpang naduh ki Seng Longkmie, Seng Samla Shnong bad ki Dorbar Shnong ki lah ban pynrung kyrteng man uwei pa uwei u nongshong shnong,” u la ong.
U CEM u la ïathuh ruh ba ha katei ka jingpynbeit thymmai, ki trai iing ki hap ruh ban pyntip sha ki Dorbar Shnong haba ki aiwai iing sha ki briew kiba nabar bad ki hap ruh ban buh bha ïa ki kyrteng jong ki namar kumba long haduh mynta ym pat don ka bor kaba la ai ha ki.
Kumta, u ong ba lyngba katei ka jingpynbeit thymmai, kan long ka jingaibor ïa ki rangbah shnong ba kin lah ban peitngor ïa ka shongsuk shongsaiñ hapoh shnong poh thaw.
Shuh shuh katkum ka jingïathuh jong u, katei ka ain kan ym takhuh bad ki ain jong ki Hima hynrei kan ong salonsar ïa baroh ki Hima kiba hapoh hapoh KHADC. Lah ban kdew hangne ba u Deputy CEM ka Council, Bah PN Syiem ha ka sngi sdang jong ka Dorbar u la wanrah ïa kane ka Khasi Hills Autonomous District (Administration of Elaka) (Second Amendment) Bill 2023.
