Shillong, Nailur, 23: Ka BJP Mahila Morcha Meghalaya, ka la ai jingïaroh ïa u Myntri Rangbahduh ka ri u Narendra Modi bad ïa baroh ki dkhot MP jong ka Lok Sabha bad ka Rajya Sabha, ki la ai jingkyrshan na ka bynta ban pynurlong ïa ka Women’s Reservation Bill.
Ha kine ki 27,797 sngi, palat 76 snem hadien ka jingïoh laitluid, khatduh ïawai ka BPP ka la lah ban pynurlong. Ha baroh kine ki snem ïa kane ka Bill la tyrwa da kiba bun ki Myntri Rangbahduh ka ri jong ngi, katto katne ki la leh tang ban ïoh jingmyntoi saiñpyr thei, hynrei ym don mano mano ruh ba lah ne kiba lah ban leh ïa kane. Ki shu kren tang na rymmiang shyntur ïa kane ka Bill bad mynta ki sdang ban shim kabu sha lade na ka bynta kane ka Bill.
Tang ka BJP hapoh ka jingïalam jong u Narendra Modi uba don ka jingshlur bad ka jingkut jingmut la lah ban ïoh ïa ka jingmynjur ïa kane ka Bill ha ki ar tylli ki Ingdorbar Thawaiñ, ïa kaba la mynjur lang da kawei ka sur na baroh.
Ka BJP Mahila Morcha Meghalaya, ka kyrshan ïa ka jingkren jong u State President jong ngi u Bah Ernest Mawrie, uba ong, “ka BJP ka peit ïa ka bha ka miat jong ki riewlum’ bad kyntait ïa ka jingkren jong u Nongaitktien ka TMC u Ripun Bora, uba long uwei na kiba la shah kynnoh, ba u donkti ha ka jingshah pynïap uwei u riewlum u Daniel Topno.
“Mr. Bora sngewbha to tip ïa kane, ka Droupadi Murmu ka dei ka riewlum, kaba la shah jied kum ka President jong ka ri, ïa kaba la tyrwa bad kyrshan da ka BJP,” la ong ka BJP Meghalaya State Unit ha u kyrwoh ba la phah sha ki lad pathai khubor.
