Jowai, Nailur 22: Ka Khasi Student Union (KSU) Shilliang Myntang Circle mynta ka sngi kala pynkup burom da ka khusnam ‘1st Mait Shaphrang Award Academy 2023’ ïaki samla pule kiba la pass bha ha ka Exam jong ka SSLC bad HSSLC na ka bynta u snem 2023-2024.
Ki samla pule kiba la ïoh ïa kane ka khusnam la jied kyrpang da ka seng khamtam ïa kito kiba dei ki nongshong shnong hapoh u pud u sam jong katei ka thaiñ kaba khmieh da ka KSU Shilliang Myntang Circle.
Ha kane ka sngi ka seng kala ïoh ban pynkup burom ïa kitei ki samla pule kiba don kumba 17 ngut na kylleng ki shnong jong katei ka thaiñ.
Na ka liang u samla rangbah u Donald V Thabah uba dei u General Secretary ka seng kmie ula long kum u kongsan, ha ryngkat ka jingïadonlang u MDC ka Barato Mukroh Constituency ma Aibor Shadap, ki nongïalam jong ka seng naduh ki District ki Circle ki Unitha ryngkat bad ki nonghikai bad ki kynnah skul.
Kitei ki nongïalam ka seng haba kren kila ai ka jingkitbok kitrwiang ïa ki samla pule ba kin long kiba trei shitom haduh ban da poi sha ka thong jong ka jingjop bad kum ki khun ka jaitbynriew ki dei ban ri ïa ka akor ka burom.
U samla rangbah u Donald V Thabah ula pynsngew hashwa jong ka snem 1990 ym shem la don kano kano ka kynhun kaba pynlong kum kine ki jingai khusnam sha ki samla pule, dei ha u snem 1994 ka KSU kala shim ïa kane ka bynta ban ai khusnam tang ïa iwei i samla pule ba wan hakhmat duh namar ha kitei ki por ki don tang ka Top 10 General bad ka Top 10 Tribal List ïa ki riew lum.
U la pynkynmaw haka snem 1994 la don tang iwei i samla Khasi iba la ïoh ban rung ha ka Top 10 General List bad ka seng kala sdang ban ai da kane ka khunsnam ïa katei ka samla bad dei ha ka snem 2005 kala ai bor noh sha ki shnat bad ki Unit ba kin pynlong ha ki jaka ba ki treikam.
Kumta ula kyntu kala dei ka por ïa ka khun samla ban kin ïakhun ïa ka Exam IAS namar ba ki khun samla jong ka jylla mynta kila lah ban ïakhun bad kiwei de ki bar jylla hapoh ka Ri na ka bynta ban bat ïa kane ka kyrdan ophisar ba hakhlieh duh.
