Hapdeng surok yn thiah ki dkhot ka KSU ha Khliehriat ba sniew palat ka surok NH-6
Khliehriat nailur 23: Kum ba la dep pynbna, ka Khasi Students Union East Jaiñtia Hills District Unit ha ryngkat ka jingïasnoh kti lang kiwei kiwei ki sengbhalang lem bad ki paidbah jong ka district, ki seng jong ki nongñiah kali, la ong ba ka jingïakhih kan kan ïaid beit shakhmat ha Khliehriat, kata ha ka sngi nyngkong, ka 25 tarik u nailur 2023 ka ban sdang naduh ka por 10 baje mynstep, kata da kaba thiah hapdeng surok bah national highway.
Ka seng ka da sngewbha eh bad pdiang sngewbha ïa kiwei kiwei ki sengbhalang bapher bapher bad ki paidbah, ki nongñiah kali kiba kloi ban ïasnohkti lang ha katei ka jingïakhih namar kane ka jingïakhih ka dei na ka bynta ka jingbit jingbiang jong baroh ki paidbah solonsar kiba mad jingeh ha ka leit ka wan na ka daw ka jingsniew jing jot rathai ka surok national highway ha East Jaiñtia Hills District.
“Kane ka long ruh ban pynsngew sha ki shkor ba kyllut jong ka sorkar bad sha ka National Highway Authority of India kiba la shu leh kuman palat khlem pyrkhat shuh ïa ka im ka ïap jong ki paidbah, ong u General Secretary ka KSU East Jaiñtia Hills District Unit, u bah K.S.Suchiang.
Sa kawei ruh ka jingpynbna ïakhih, ka long ba naduh katei ka sngi jong ka 25 tarik mynta u bnai nailur, kata naduh ka por 7 baje mynmiet haduh ka por 5 baje mynstep kan don ka jingsangeh ki kali ba kin ïaid na ki bynta jong ka surok national highway East Jaiñtia Hills District, ha ka por mynmiet, ïa kane ka seng hi kam lah ban pynbor ïano ïano, hynrei ka dei tang ka jingkyntu bad jingkyrpad ïa baroh kiba ñiah kali kiba napoh ka jylla bad kiba na bar jylla ruh kumjuh ba kum ka dak ka jingïa snohkti lang ba kin sangngeh ban ïaid kali ha ka por mynmiet namar ka jingleh mynthi ka NHAI, ka bym shim khia bad ka bym don ka jingkitkhlieh ban maramot ïa ka surok kaba la jot rathai bad kaba la buh jingma wat ïa jingim briew “Ka jingïa snoh kti lang jong phi kan wanrah ïa ka jingjop bad kan pyn pei ïa ki shkor ba kyllut jong ka sorkar bad ka NHAI” ong u nongïalam ka KSU-EJHDU.
Ha kajuh ka por, ka seng ka kyrpad ïa baroh ba hapdeng ka jingïakhih ba jai jai da kaba thiah hapdeng surok, ka seng ka kyrpad ba ym dei pat mano mano ban shim kabu ban wanrah ïa ka jingklumar lane ka huri hura.
Kum ban shu bynrap, ka jinglong jingman ka surok national highway ha East Jaiñtia Hills District, ka la nang jot nang pra katba nang mih ki sngi bad ka la buh jingma ruh ïa ka jingim briew ha barohshi lynter ka surok naduh Tuber shaduh Malidor, bun ki kali ki la sniew bad ki la shu sahkut shiteng lynti na ka daw ba sniew palat ka surok, ka wanrah ruh ïa ka jingdheng kali kaba jur bha ha kiba bun ki bynta jong ka surok, kane ka ju buh jingeh haduh katta katta ym tang ïa ki nongleit nongwan, hynrei wat ïa ki kali kit nongpang ruh kiba donkam ban pynpoi kyrkieh ïa kiba pang ba shitom sha ki jaka ai jingsumar “Hato lada jia kaei kaei kaba sngewsih, ïa kiba pang ba shitom mano ban kitkhlieh”?
Ka jingleh mynthi ka sorkar bad ka NHAI ka la buh ïa ki paidbah ha ka umdum kaba kim lah shuh ban mutdur ïa ka jingkuman ka ba khlem pyrkhat shuh ïa ki paidbah, ha ka por ba slap la jur dap sa tang ka jyrshieh ha surok, ka um slap ka lang kum ki pung hapdeng surok kaba buh jingeh bad buh jingma ïa kiba leit ba wan bad ha ka por ba rang ka bneng la jur tang ka khyndew pum pum kaba buh jingma ïa ka koit ka khiah jong ki paidbah.