Shah pynkup burom 1018 ki samla pule ka MLCU, Shillong kiba la pyndep ïa ki kyrdan pule

Shillong, Nailur, 23: Palat shi hajar ngut ki samla pule jong ka Martin Luther Christian University, Shillong kiba la pyndep ïa ka kyrdan Graduate ha ka sngi Thohdieng ki la shah pynkup burom ha ka jingïalang kaba la long ha “Lariti”, Mawdiangdiang, New Shillong.
Ha ka jingpynkup burom ïa ki samla pule ha ka 16th Convocation day, u Myntri ka tnat Pule Puthi ka Sorkar Jylla u Rakkam A. Sangma u la long kum u Kongsan ryngkat ka jingsakhi lang jong ki nonghikai jong ka MLCU.
30 ngut ki la don kiba shah pynkup burom ha kane ka sngi kum ka jingithuh ïa u synniang u bynhei ba ki la noh sha u sup u thiar jong ka imlang ka sahlang bad kiba ju ïatreilang bad University ha kaba pyntyllun ïa ki jingai jinghikai bad ka jingphah hikai pyntbit ha ki Private Institution bapher bapher.
U Dr. Theyiesinuo Keditsu u la long u nongai jingkren ba kyrpang ha kane ka sngi.
U Rakkam A. Sangma haba kren kum u Kongsan u la ong, ‘ki mishonneri jong ki Balang Khristan bad ki mishoneri na ka ri America ki dei kiba la pun jingkieng ban shakri ïa ngi bad ban hikai ïa ngi kumba ngi long mynta ym ban pynkylla niam hynrei ban trei hapdeng jong ngi da kaba bet ïa u symbai jong ka jingnang jingstad khnang ban pynïasoh ïa ngi kum kawei ka jaidbynriew bad kiwei kiwei ki thaiñ ha ka kylleng ka pyrthei.”
U la ïasam ruh katto katne ki laiñ kiba la kren da u Lamphang barim jong ka Lok Sabha u P A Sangma (bam kwai ha dwar U Blei) ha kaba u la ong, ka pule puthi ka pynlong ïa u Khasi u Khasi ba janai, u Garo sha u Garo ba janai, u Naga sha u Naga ba janai, u riewngeit Hindu sha u Hindu ba janai, u riewngeit Mukslim sha u Muslim ba janai bad u Khristan sha u Khristan bajanai.
Ha kaba ïadei bad ka National Education Policy, u Sangma u la ong ba ki rukom hikai bad ki lynnong pule kiba bun kin ïarap ïa ki khynnah ba kim donkam shuh ban khuslai namarba kane ka polisi ka la plie lupa ïa ki mawpud bym don jingkut ban pule bad bad lah ruh ban kylliang ïa ki sobjek katkum ka jingkwah lajong.
“Ki kam sorkar kim lah shuh ban dang aikam aijam ïa baroh ki Graduate dei na kane ka daw ba ka New Education Policy kaba thymmai ka la plie lad da kawei pat ka jingpule ka ban pynmyntoi ïa ki samla pule,” u la ong.
Ha kane ka sngi, la sakhi lang da u Chancellor jong ka MLCU u Prof.Glenn C. Kharkongor, u Vice Chancellor u Prof. TK Kharbamon, u Pro Vice Chancellor u Bah Malcolm D Roy, u Registrar Dr. Iwamon W.J Laloo, Controller of Evaluation & Examination Dr. Ardonister Lyngdoh, Dean Faculty of Theology & Religious Studies Prof. Dr. Samuel Meshack, Finance Officer Sonia L Tron bad Dean of Research Dr. Larilin Kharpuri.