Shillong, Nailur, 23: Ka iing kaba ri bad sumar ïa ki tymmen ki kro kaba la ai kyrteng ka Kripa Victoria Old Age Home, kaba la seng da i Kong Victoria Wahlang, ka la kynjoh sha ka jingdap shisnem thik naduh ba la plie ïa ka da ka jingthmu ban peit bad sumar khlem jingsiew ïa ki riew tymmen kynthei kiba bym don khun lane kiba ki khun bad ki bahaiing kim kotbor shuh ban ri ïa ki ha ka jinglong tymmen na kiba bun ki daw.
Kane ka iing ka la rakhe ïa ka jingdap shi snem ha ka 19 tarik mynta u bnai.
Ban pyneh rngiew ïa kane ka lyngkhuh snem kaba nyngkong jong kane ka iing kaba don ha Umroi Nongsder, Ribhoi District, la rakhe kyrpang ruh ïa kane ka sngi da kaba pynlong ïa i jingïalang ba lyngkot, ha kaba la ïadon lang uwei na ki heh ophisar Sorkar uba la long teng ruh u Deputy Commissioner jong ka East Khasi Hills District u Bah Peter S. Dkhar kum u Kongsan ryngkat ka jingdonlang jong ka Director ka tnad Social Welfare ka jylla ka Kong CD Lyngwa, u Chief Medical Officer jong ka AMD DAE jong ka Sorkar Pdeng u Dr. Biplab Chatterjee, ki nongpynïaid jong kane ka iing bad kiwei kiba la shah khot sngewbha ha kane ka sngi.
