Lada dei u Prah Khasi don jingma hynrei ka VPP ka dei u Prah na West Bengal : Pynïaid
Shillong, Nailur 22 : U Chief Exevcutive Member (CEM) ka Khasi Hills Autonomous District Council (KHADC) uba dei u MDC jongka Sohryngkham Constituency u bah Pyniaid Sing Syiem u la ong lada dei shisha u Prah Khasi ka don ka jingma ha ka election hynrei ka VPP ka dei u Prah na West Bengal kumta ym don jingma satia.
Kane ka jingkynthoh u bah Pyniaid ka long ha ka por ba ïakren bad ki lad pathai khubor ha ka Sngi Thohdieng hadien ba la wai ka Dorbar Kyrpang ba arsngi jongka KHADC.
U la kren ruh ïa kane namar ka jingpynkhreh ïa ka election MDC ka la ïaid shaid shaid namar ka election kan long ha u 2024 na ka daw ba kat haduh mynta ruh ym pat wanrah ïa ka Bill ban pynkylla ïa ka 6th Schedule. U la ong ka NPP kam don jingtieng ïa ka VPP namar dei u Prah na West Bengal ym u Prah Khasi kumba la shah pynbiej ki paidbah baroh shi katta.
Shuh shuh u Bah Pyniaid u la ong ba kam don jingeh re, ai ba ki paidbah kin bishar da kaba ong, “Lada dei u prah Khasi kan neh hynrei ba ka VPP ka dei u prah na West Bengal yn ym neh re”.
U Bah Pyniaid u la bynrap ruh, lyngba kine kiei kiei kiba ïohi ba ka thew shata lyngba ki jingjia.
Halor ka jingshah rem noh ha ka election MLA ha u kyrtong jong ka VPP, u Bah Pyniaid u la ong ba ka jingshah rem ka jong u ka shu long ba ym tip ïa u kyrtong ba ïakhun pyrshah u dei u ei namar lada lah tip lah kham suk ban ïakhun.
Shuh shuh u Bah Pyniaid u la ong ba ki lah ban pynbiej ïa ki paidbah tang shisien ym ar sien bad mynta ki paidbah ki la nang shai haba kren ïa shibun ki mat.
Haba kylli ïa ka jingïadei bad u nongïalam ba mynta jong ka VPP namar u la ju ïatrei lang bad u la jop MDC nyngkong eh na ka HSPDP ba ialam da u bah Ardent, u bah Pyniaid u la ong sa tang kiba ïa kynduh kam bad ïatrei lang bad u bah Ardent ki ban tip ma u u la dep ïatrei lang bad u la tip lut nadong shadong bad kiba lah mad ha ka rukom trei kam ki la sngewthuh bad bun kim don shuh bad kiba don mynta ïoh kim pat ïa mad u la ong.
Haba kylli balei u ong ba ka VPP ka dei u Prah na West Bengal u bah Pyniaid u la ong ba un sa batai bniah bha ha kawei ka sngi bad ki paidbah kin sa sngewthuh bad kyndit ruh.