Hadien ba leit khang tala u CEM ïa ki dukan beaiñ, wan pyndem tdong ki bar jylla ha KHADC

Shillong, Nailur 23: Khyndiat sngi hadien ba u Chief Executive Member ka Khasi Hills Autonomous District Council u Bah Pyniaid Sing Syiem u la leit ban ïalam hi da lade ban leit khang tala ïa 46 tylli ki dukan bar jylla ha ka them Ri Bhoi, mynta ka kynti napdeng kitei ki 46 tylli ki trai dukan ki la wan ban pyndem noh ha ka ophis jong ka KHADC.
Kum ban shu kdew ba kitei ki 46 tylli ki dukan ki dei jong ki bar jylla kiba plie beaiñ ïa ki dukan ha ka thaiñ 13 mer haduh Byrnihat ki dei kiba ym shym la don satia ïa ka trading license napoh ka ophis jong ka KHADC.
Haba ïakren bad u Bah Pyniaid Sing Syiem uba dei u Chief Executive Member ka KHADC u la ïathuh ba hadien khyndiat jong ka jingshah khang khyrdep jong kitei ki dukan, ha ka 21 tarik mynta u bnai kitei ki trai dukan kiba don kumba 15 ngut tam ki la wan mih sha ka ophis jong ka KHADC da kaba ki la pynpaw ruh ba ki la sngewthuh ïa la ka jong ka jingbakla.
“Ngi la sngewthuh ïa ka jingbakla bad kwah ban ïaid noh katkum ka lynti jong ka aiñ kumba la btah da ka KHADC la pynpaw kitei ki tari jaka sha ki bor khmih jong ka Council” pyntip u Bah Pyniaid.
Ha kawei pat ka liang halor ka jinglap jong ka jingleit ban khynra trading licence ha ka thaiñ Bimola, ha kaba la shem ba don ki thei Khasi kiba kam trai ïa ki mar jong ki bar jylla u Bah Pyniaid u la pyntip ba ïa kane ka kam u la aiti sha u Executive Member jong ka Trade lem bad ki ophisar ban phah da ka show cause sha baroh.
“Nga la bthah ïa ki ophisar ba ki dei ban ai da ka show cause sha baroh naduh na Bimola shaduh Umsohsun bad la phah ruh ïa ki ophisar ba kin leit ban tohkit khamtam eh na ka bynta kito ki dukan ba ki thei Khasi ki ïarap ïa ki bar jylla” ong u Bah Pyniaid.