Nongstoiñ, Jylliew 08: Ka office jong ka District Disaster Management Authority, Eastern West Khasi Hills District, ka la pyntip sha baroh ki nongshong shnong kiba hap hapoh ka Eastern West Khasi Hills District, ba ki dei ba bud ryntih ïa kine ki jingai jingmut kum shibynta ban ïada ïalade ha ka por ba jur slap bad khie eriong.
La kyntu ïa ki paidbah ba ki dei ban kiar na kaba leit shajan ki wahbah, ki wah duid bad ki kshaid ha ki por ba jur slap. Dei ban kiar na kaba ïaid ha ki surok ba la shlei um ne ki um kiba tuid sted, namar ka jingtuid jong ka um ka lah ban rong noh da kaba suki ïa u briew.
Ki nongleit nongwan ki dei ban husiar haba ki ïaid ha ki surok shnong, ki surok bah bad ki surok khap lum ha ka por ba jur slap khamtam ha ka por miet, namar ka lah ban don ka jingtwa khyndew. Khmih bad pynskhem bha ïa ki tiar kiba don sawdong ka ïing kum ki tin tap ïing ne ki tin tap ïa ki sem kiba shong synjor, ki tiar rep bad ki signboard kiba lah ban shah rong ha ka lyer kaba jur.
Dei ban khang bad pynskhem bha ïa ki jingkhang lane ki jingkhang ïit khnang ban ïada na ka jingjulor ha ka por ba don ka eriong. Ha ka por ba jur u pyrthat bad ka leilieh, la kyntu ïa ki paidbah ban kiar na kaba mih na ïing ne ban ieng hajan ki dieng kiba jrong khamtam hajan ki dieng electric ne ki laiñ bording.Dei ban pynlip kloi kloi ïa ki tiar electric kum ki TV, ki mobile charger, isteri bad kiwei kiba ju pyndonkam da ka bor electric.
Ki nongrep ki dei ban kiar na kaba trei ha ki lyngkha ha ka por ba jur slap, eriong, pyrthat ne phria, ki dei ban sumar ïa ki jingri ha ki jaka rieh kiba shngaiñ. La kyntu ïa ki kmie ki kpa, ki bor pynïaid skul ba ki dei ban pyntikna ba ki khynnah skul, kin sah hapoh ïing ne ha ïing skul ha ka por ba jur ka eriong bad mana ïa ki na kaba ïalehkai shabar ha ki por ba don jingma.
Lada ka don ka jingïap jong ki mrad dei ban pyntip kyrkieh sha ki BDO bad sha ka tnat Veterinary jong ki block hapoh ka 24 kynta.Dei ban khmih bniah ïa ki jingbthah bad jingmaham shaphang ka jinglong ka suin bneng katkum kaba lah pynmih da ka tnat mariang jong ka Ri India (IMD) bad ki bor pynïaid district.
Lada jia ba don ka jingshah pynjulor ha ki bor mariang dei ban phone ha u number 112. Na ka bynta ki lad jingïarap ba long kyrkieh haba don ki jingjia shah ktah dei ban pyntip bad phone sha ka District Control Room No. 03657-282254/1077 lane Emergency Helpline 112 bad ruh sha u BDO jong ka Mairang Block bad ka Mawthadraishan Block.
