Na Mairang ai nuksa u President UDP kumno ki paidbah ki babe hadien ka elekshon MP 2024

Shillong, Jylliew 08 : U MLA ka Mairang ba dei ruh u President Rangbah jong ka UDP Bah Metbah Lyngdoh u la ai nuksa ba kumno ka constituency jong u ka ai vote ha ki lai tylli ki elekshon ba la dep, kata da kaba pynïapher naduh ka MLA, MP bad ruh ha ka elekshon MDC.
Haba kren ha ka jingïalalang pynithuh ïa u kyrtong MP ka UDP ha Mairang ha sngi Saitjain, u Bah Metbah u la ïathuh ba ha ka elekshon MLA 2023 ki paidbah ki la ai haduh 19,000 vote ban pynjop donburom ïa u. Hynrei u la ong pat ba ynda la wan ka elekshon MP 2024 ki paidbah ki la ai tang 8,000 vote.
“Kane ka mut ba ka jingjah ka vote ka la kot sha ka 11,000 vote ha ka elekshon MP na kaei kaba nga ïoh ha ka elekshon MP,” u la ong.
Tangba, u ong pat ba ynda la poi ka elekshon MDC ha u 2025, kata tang hapoh shisnem hadien ka elekshon MP, ki paidbah ki la ai haduh 11,000 vote. “Kane ruh khlem da khein shuh ïa ki jaka kiba hap sha ka Mawthadraishan constituency ha ka MDC,” u la ong.
Nangta u ong ruh ba lada ki paidbah ki la sngewthuh kumba ki la pynpaw ha ka elekshon MDC, khlem artatien kan sa poi biang ka vote kumba ka poi ha ka elekshon MLA ha u 2023 da kaba kynjoh sha ka 19,000 ne tam.
Shuh shuh u ong ruh ba ha ka elekshon shisien ba la bakla hap ban ap biang haduh san snem ban pynbeit ïa ka. “Kumta kam myntoi ban babe ynda la dep ka elekshon namar shisien ba la bakla la hap ban ap biang haduh san snem. Kumta ban babe ynda la dep ka kam ym don jingmut ne jingmyntoi shuh,” u la ong.
Nangta u ong ruh ba u kwah ban pynkynmaw biang ba watla ki ïoh tang 44,000 vote ha ka elekshon MP 2024 hynrei ka jingïoh vote jong ka party ha ka elekshon MDC na KHADC bad JHADC pat ka la kot sha ka 3lak vote kaba pyni ba ki paidbah ki la phai biang sha ka party da ki bun bun shah tang hapoh shisnem.
“Ngi la rai ban ïaid beit jai bad ngi la dep rai ruh ban ym kynthoh, kynnoh ne kren bein ïano ïano,” bynrap biang u Bah Metbah.