Ngan pynsawa ïa ka sur ha Rajya Sabha, ong u James K.Sangma hadien ba thep kyrteng

Shillong, Jylliew 08 : U MLA bad Myntri barim ka Jylla James, K Sangma ha ka sngi Nyngkong u la pyndep ïa ka jingthep kyrteng kum u kyrtong ka National People’s Party (NPP) na ka bynta ka elekshon MP Rajya Sabha kaba la buh ban long ha ka 18tarik mynta u bnai.
U James Sangma u dei kyrtong ba la pynieng bad kyrshan da baroh ki party kiba donlang ha ka kynhun synrop jong ka sorkar Meghalaya Democratic Alliance (MDA) hapoh ka jingïalam jong ka NPP. Kumta ha kane ka sngi thep kyrteng ha khmat u Returning Officer la synran lang ïa u da ki MLA na baroh ki party kiba donlang ha sorkar synrop kynthup naduh u National President ka NPP ba dei ruh u Myntri Rangbah ka Jylla Conrad K Sangma nalor kiwei kiwei ki MLA bad Myntri Sorkar.
Na ka liang u kyrtong haba kren bad ki lad pathai khubor hadien ba la dep thep kyrteng u la pynpaw ka jingsngewnguh ïa ka sorkar MDA hapoh ka jingïalam jong u Conrad ba ki la kyrshan bad tyrwa ïa ka kyrteng jong u na ka bynta katei ka shuki kaba donburom ha Rajya Sabha.
“Lada nga shah jied ban long kum u MP Rajya Sabha ngan pynsawa ïa ka sur hapoh Iing Dorbar khnang ban pynsngew ïa ka sur jong ka Meghalaya,” u la ong.
Ha kajuh ka por na ka liang u Chairman ka MDA ba dei ruh u Myntri Rangbah ka Jylla Conrad K Sangma u la ong ba lada u kyrtong ka NPP u shah jied ban long kum u MP ba thymmai ha Rajya Sabha un sa rah bun ki mat kiba kongsan bad kiba donkam jong ka Jylla ban ïatai bad ïasaid.
“Ngi khmih lynti ba u MP un long ka jing kieng hapdeng ka sorkar jylla bad ka sorkar pdeng halor kiba bun ki ishu kiba ka jylla ka donkam,” ong u Conrad. Katkum ka jingong jong u, une u MP ba thymmai un rah ruh ïa ki ishu kiba ïadei bad ka Inner Line Permit nalor kiwei kiwei ki kam kiba ktah ïa ka jylla.
Nalorkata u ong ruh ba ki kyrmen skhem ba u MP un don ruh ïa ka bynta kaba kongsan bha na ka bynta ban ïakhun pynrung noh ïa ka Ktien Khasi bad Garo ha ka Khyrnit kaba Phra jong ka Riti Synshar jong ka Ri, nangta ban ïakhun ïa ki bynta ba ïadei bad ka Khyrnit ba Hynriew, ka FCRA, ka jingïoh rung ki mynder bad kiwei kiwei.
Ha shwa kane, u Conrad u la pynpaw ïa ka jingsngewskhem ba u kyrtong ka party bad jongka MDA hi baroh kawei un jop suk ha kane ka elekshon MP sha Rajya Sabha kaban sa long shen.
“Na bynta kiwei ki kyrtong ngam tip bha hynrei lada long kumno kumno ruh ngi sngewskhem ba ka MDA ka don ïa ka kabu ksiar ba kan ïoh ïa ka jingjop ha kane ka elekshon,” u la ong.