Dang kloi than ban kren ei ei halor ka CJP kum ka seng saiñpyrthei : Conrad K Sangma

Shillong, Jylliew 08 : U Myntri Rangbah ka Jylla Conrad K Sangma ba dei ruh u National President ka NPP ha ka sngi Nyngkong u la ong ba ka dang kloi than ban kren ei ei halor ka party thymmai, ka ‘Cockroach Janata Party’ (CJP) ha ka Ri.
Haba pyrshang ban kylli halor ka jingïohi jong u haba ïadei bad kane ka kynhun thymmai, u Myntri Rangbah u la ong ba ka jingkhlain jong kano kano ka party ka shong eh ha ki nongrim treikam kiba biang ym dei eh tang ha ka jingkhring briew.
“Ngam don ban ong ei ei ne kynthoh ïa kano kano ka seng saiñpyrthei namar kum ka party ka donkam ban don ïa ka nongrim treikam bad ki kyndon bad ki thong treikam katkum ka Riti Synshar. Kumta nga ngeit ba tad haduh ba ka party ka la don la ka jong ka nongrim treikam, dei tang haduh kata ka por ba ngan sa lah ban ong e iei,” ong u Myntri Rangbah haba kren bad ki lad pathai khubor.
Une u heh duh ka NPP u la kdew ruh ïa ka bynta kaba khraw jong ki social media ha kane ka juk mynta ban pynrung ïa ka jingsngew ha ki paidbah. Hynrei, u la ong ba ka don ka jingïapher kaba jur haba ïadei bad ka jingkhih jong ki paidbah bad ka seng saiñ pyrthei kaba pura.
“Ha kane ka por ka lah ban don ka jingkhihwin jong ki paidbah. Ki social media ki long kiba donbor bha, bad ka long kaba suk ban pynïasoh ïa ki mat bapher bapher bad ki nongrim bapher bapher. Ki briew shimet bad ki prokram ki lah ban shim ïa ki sienjam, hynrei ka seng saiñ pyrthei ka long kaba kham jngai na ka jingkhih ki paidbah. Ka jingkhih ki paidbah ka long tang ka jingsdang. Kumta ka dang don ka lynti kaba jngai bha ban ïaid. Ngi hap ban ap bad peit kumno kine kiei kiei kin long bad kin kut,” bynrap shuh shuh u Conrad K Sangma.
Shuh shuh u la ong ba kam dei satia kaba suk ban pynïaid ïa ka seng sain pyrthei namar ki don shibun ki jingeh khamtam ban long kiba ïai neh bad ïai shah.